Jýyrda Qarjylyq monıtorıng agenttiginiń baspasóz qyzmeti elimizde jobalardy, bastamalardy jáne startaptardy qarjylandyrýǵa aqsha jınaýdyń ınnovasııalyq tásili bolyp sanalatyn kraýdfandıngti ońaı jolmen baıý maqsatynda paıdalaný oqıǵalary jıilep ketkendigin málimdedi. Naqty aıtqanda, túrli kúmándi maqsatqa qarajat jınaýǵa 138 banktik karta tartylǵan. Jalǵan kómek suraýshylarǵa 660 myńnan astam otandasymyz aqsha jibergen. Jınalǵan qarjynyń jalpy somasy 6 mlrd teńgeni quraǵan. Onyń ishinde 2 mlrd teńge boıynsha alaıaqtyq jasaý belgileri baıqalǵan.
Áleýmettik jelide alaıaqtar «emdelý» jáne «muqtaj jandarǵa kómek kórsetý» degen jeleýmen aqsha jınaýdy esh kedergisiz jáne baqylaýsyz iske asyryp júr. Shyntýaıtynda, olar jınalǵan mol qarajatty jyljymaly jáne jyljymaıtyn múlikterdi satyp alýǵa, turmystyq shyǵynǵa, býkmekerlik keńselerde bás tigýge, sheteldegi qymbat páterlerdi jalǵa alýǵa jumsaıtyn kórinedi. Demek áleýmettik jelide aýyr syrqaty nemese múshkil hal-jaǵdaıyn aıtyp zar ılep turǵan adamdardyń sózderiniń shyndyǵyna kóz jetkizbeı, olarǵa birden kómek qolyn sozý alaıaqtardyń arbaýyna túsip, bosqa shyǵyndaný múmkin ekenin esten shyǵarmaǵan jón.
Jaqynda Joǵarǵy sottyń baspasóz qyzmeti Almaty qalasynyń mamandandyrylǵan aýdanaralyq ekonomıkalyq sotynyń sheshimimen osy megapolıstegi «Jibek joly» qaıyrymdylyq mekemeleri qaýymdastyǵynyń quramyna kirgen, bilim salasyndaǵy 26 qaıyrymdylyq mekemesiniń memlekettik tirkeýi joıylyp, qyzmeti toqtatylǵandyǵyn habarlady. Ýákiletti organ júrgizgen tekseristiń qorytyndysy boıynsha olardyń tek 11-i naqty jumys istegen, al 15-i tirkelgen jerinde joq bolyp shyqqan.
«Ońtústik astanadaǵy» qyzmeti toqtatylǵan qaıyrymdylyq mekemelerinde balalardyń ómiri men densaýlyǵyna tikeleı baılanysty, sonyń ishinde kóshi-qon, eńbek, jer, ekologııa jáne turǵyn úı máselelerine qatysty óreskel zań buzýshylyqqa jol berilgen. Sondaı-aq sáýlet, qala qurylysy jáne qurylys qyzmeti, órt qaýipsizdigi talaptary, sanıtarlyq-epıdemıologııalyq normalar, dinı, qaıyrymdylyq jáne qarjylyq-sharýashylyq qyzmet salalarynda zań buzýshylyq áshkerelengen. Is júzinde bul mekemelerdiń atqarǵan jumystary olardyń jarǵylyq maqsattaryna qaıshy keletindigi anyqtalǵan. Onyń ústine, keıbireýleri bilim berý qyzmetimen tıisti lısenzııasyz aınalysqan. Balalardyń tıisti bilim, tárbıe jáne medısınalyq kómek alý quqyqtary aıtarlyqtaı buzylǵan.
Atalǵan qaıyrymdylyq mekemeleriniń dinı beıimdelgendigi dáleldengen, al Qazaqstan musylmandary dinı basqarmasy «Jibek joly» mekemesimen jasalǵan memorandýmnyń kúshin birjaqty tártippen joıǵan.
Zańnamany buzǵan qaıyrymdylyq mekemeleriniń birqataryna jáne olardyń basshylaryna qatysty qylmystyq is qozǵalǵan. Olar kámeletke tolmaǵan balanyń ózine qol jumsaýyna, áleýmettik, ulttyq, násildik, dinı arazdyqty qozdyrýǵa, sot ekstremıstik jáne terrorıstik dep tanyǵan ádebıetter tabylýyna baılanysty.
Qoı terisin jamylǵan qasqyrlar sııaqty «qaıyrymdylyq mekemesi» mártebesin paıdalanyp, zańsyz is-áreketpen aınalysqan uıymdar jabylyp, basshylary tergeýge alynǵanymen, osy oqıǵa elimizdegi qaıyrymdylyq salasyna degen senimge selkeý túsirgeni anyq. Sondyqtan múddeli memlekettik organdar áleýmettik jelide jurttan jalǵan járdem suraý arqyly alaıaqtyq jasaýshylardy áshkereleý, qaıyrymdylyq mekemeleri men qorlarynyń jumysynyń ashyqtyǵy men eseptiligin qamtamasyz etý sharalaryn qolǵa alsa, ıgi.
