Oqys oqıǵa týraly habar jedel járdem operatoryna 16-maýsym kúni tańerteńgi saǵat 09:49-de túsken. Dárigerlerden quralǵan 5 brıgada oqıǵa ornyna 5 mınýttyń ishinde jetip úlgergen.
«Zardap shekkender – barlyǵy 10 adam, olardyń 2-eýi kámeletke tolmaǵan er bala, eresekterdiń jas shamasy 27-67 aralyǵynda», dep habarlady Batys Qazaqstan oblystyq densaýlyq saqtaý basqarmasynyń baspasóz qyzmeti.
Bir táýlikten keıingi jaǵdaı mynadaı: qazirgi ýaqytta 3 eresek adam reanımasııada, 4-eýi polıtravma bólimshesinde jáne eki jasóspirim kópbeıindi oblystyq balalar aýrýhanasynda qajetti em alýda. Jasóspirimniń bireýi – jansaqtaý bóliminde, bireýi polıtravma bólimshesinde jatyr.
Naýqastardyń hálin densaýlyq saqtaý basqarmasynyń basshysy Madııar О́teshev, basshynyń orynbasary Gúlnár Ábdirahmanova, DSB bas shtattan tys travmatology Serik Qarekenov jáne qalalyq kópbeıindi aýrýhana dırektory Arman Myrzahmetov arnaıy baryp kórdi. Tıisti mamandardyń qatysýymen konsılıým ótkizilgen. Sondaı-aq, Astana jáne Almaty qalalarynyń Apattar Medısınasy Ortalyǵy reanımatologtarymen jáne kombýstıologtarymen birlesip telemedısına júrgizilgen. Qazir kelisilgen emdeý taktıkasy boıynsha em-shara júrgizilip jatyr .
Batys Qazaqstan oblysynda sońǵy kúnderi kún raıy óte ystyq, 40 gradýsqa jaqyndap tur. Tótenshe jaǵdaılar departamenti joǵary órt qaýpi qaterin kún saıyn habarlaıdy. Úsh kúnge sozylatyn qurban aıt kezinde qaýipsizdikti saqtaý týraly QMDB-nyń Batys Qazaqstan oblysyndaǵy ókil ımamy Samat Álibaev ta úndeý jasady.
Qazir halyq kóp jınalatyn qoǵamdyq oryndarda, qurban aıt shalynyp jatqan qasaphanalarda qaýipsizdik sharalary kúsheıtildi.
