2023–2024 jyldardaǵy maýsymnyń fınalynda «Qaırat» pen «Semeı» saıysqa tústi. Alǵashqy úsh oıynnyń nátıjesi boıynsha Davı Pereıra De Mendonkanyń shákirtteri 2:2 esebimen alda kele jatty. Sheshýshi tórtinshi match ta óte shıelenisti ótti. Birinshi taımnyń ózinde qos komanda bir-biriniń qaqpasyna úsh goldan saldy – 3:3. Úzilisten keıin almatylyqtar alymdy kóringenimen, qarsy jaqtyń qorǵanys shebi saýatty oınady. Tablodaǵy esep ózgermegennen keıin ekstra-taım belgilendi. Qosymsha ýaqytta Kaıo Torres nysanany dál kózdedi. Bul – semeılikterdiń sapyndaǵy brazılııalyq legıonerdiń osy kezdesýdegi úshinshi goly! Het-trık! Desek te kóp uzamaı Alıson tarazy basyn teńestirdi – 4:4.
Báseke teń aıaqtalǵannan soń penaltıler soǵyldy. Bul tartysta «Semeıdiń» asyǵy alshysynan tústi – 3:1. Sóıtip, byltyr ǵana irgetasyn qalaǵan Abaı oblysynyń komandasy el chempıony atandy. Al Marlona Velasko baptaǵan jigitter kúmis medaldi qanaǵat tutty. «Naǵyz sensasııa!» dep osyny aıtyńyz.
Esterińizge sala keteıik, kelesi jyly 30 jyldyq mereıtoıyn toılaǵaly otyrǵan «Qaırat» 2003-2024 jyldar aralyǵynda qatarynan 20 ret Qazaqstan chempıony atandy. 18 márte el kýbogin jáne 8 ret sýperkýbokti oljalady. Sondaı-aq almatylyqtardyń ÝEFA Chempıondar lıgasynyń eki dúrkin jeńimpazy (2012/13, 2014/15) jáne Qurlyqaralyq kýboktiń ıegeri (2014) degen ataǵy bar.
