#AýylFýtbol jobasy aıasynda «Halyk Open Cup» óńirlik týrnırleri buǵan deıin Almaty jáne Soltústik Qazaqstan oblystarynda ótken. Alda 11 oblysta jalǵasyn tabady jáne oblystyq týrnırlerdiń jeńimpaz komandalary qazanda Almatyda ótetin respýblıkalyq týrnırde baq synaıtyn bolady.
Jambyl oblysynda ótken týrnırdiń ereksheligi - Qordaı aýylynan «Best» qyzdar komandasy baq synady. Bul komanda fýtbol oınaýdy ótken jyldyń jeltoqsanynda bastasa da nátıjeleri jaqsy. Bıyl Bishkekte ótken halyqaralyq týrnırde úzdik bestik qatarynan kóringen.
«Halyq» qory qurylǵan segiz jylǵa jeter-jetpes ýaqytta respýblıka kóleminde túrli bastamalar men áleýmettik jobalardy damytýǵa 85 mlrd. teńgeden astam qarjy bóldi. Qordyń demeýshiliginiń arqasynda #Aýylfýtbol jobasy jańa deńgeıge kóterildi. Bir ǵana mysal - jobadaǵy komandalar sanynyń qysqa merzimde tórt ese, ıaǵnı 24 komandadan 110 komandaǵa deıin artýy, - dep atap ótti qordyń Almaty oblysy fılıaly dırektory Ǵalymbek Jaqsylyqov.
Jambylda ótken HALYK OPEN CUP oblystyq týrnırinde birinshi oryndy Kenen aýylynyń «KENEN» komandasy, ekinshi oryndy Sádý Shákirov aýylynyń «Shona» komandasy, úshinshi oryndy Qordaı aýylynyń «S.Murtaza» komandasy ıelendi. Sarsenbaı Nurtaza (S.Murtaza) týrnırdiń «Úzdik shabýylshysy» atansa, «Úzdik qorǵaýshy» nomınasııasymen - Tólen Sanjar (Shona), «Úzdik qaqpashy» nomınasııasymen - Temirbek Erjan (Qarataý), «Úzdik oıynshy» nomınasııasymen - Atabek Ańsar (KENEN), «Úzdik jattyqtyrýshy» nomınasııasymen KENEN komandasynyń treneri Jumabek Sultan marapattaldy.
Barlyq júldegerler «Halyq» qaıyrymdylyq qorynyń kýboktary jáne eksklıýzıvti medaldarymen marapattaldy. Uıymdastyrýshylar bul týrnır aýyl balalary úshin ózin-ózi kórsetýge tamasha múmkindik bolǵanyn atap ótti.
«Týrnırler kóp, biraq olar kóbinese aýyl komandalary úshin qoljetimsiz. Sebebi formaǵa aqsha kerek, jarystarda aqyly, ıaǵnı 50-100 myń teńge aralyǵynda tólem jasaý qajet. Odan ózge komandany tasymaldaý shyǵyny bar. Bul aýyl sportyndaǵy negizgi máseleler. Bizdiń #AýylFýtbol jobasy aıasynda «Halyq» qaıyrymdylyq qorynyń bas demeýshiligimen 100 komanda qural-jabdyqtarmen jáne formamen qamtamasyz etilip, týrnırge qatysý úshin jol aqysy tólendi jáne týrnırdiń ózi, balalar úshin tegin, eshqandaı alymdar joq», - deıdi #AýylFýtbol jobasynyń jetekshisi Serik Mámbetov.
Qordyń bas demeýshiligine ıe jobanyń basty maqsaty – aýyl balalarynyń sportpen shuǵyldanýyna múmkindik jasaý jáne sport arqyly jan-jaqty tárbıeleý. Bul maqsatta «Halyq» qory #AýylFýtbol jobasyna engen komandalardy qural-jabdyqpen qamtamasyz etýmen qatar qurama komandalardyń túrli deńgeıdegi jarystarǵa qatysý, arnaıy bazalarda oqý-jattyǵý jıynynan ótý shyǵyndaryna qarjylaı qoldaý bildirip otyr.
Sondaı-aq, joba aıasynda respýblıka boıynsha oblystardaǵy 100 aýyl fýtbol komandalarynyń jattyqtyrýshylary UEFA-nyń D sanaty boıynsha biliktiligin arttyrý kýrsynan ótip, sertıfıkattaldy jáne qosymsha túrli trenıngterge qatystyrylýda.
