Áskerı keńes: jyl qorytyndysy

Almaty qalasynda Qazaqstan Respýblıkasy Ulttyq qaýipsizdik komıteti Shekara qyzmetiniń Áskerı keńesi bolyp ótti. Oǵan Ulttyq qaýipsizdik komıtetiniń tóraǵasy Nurtaı Ábiqaev qatysty, dep habarlady QR UQK ShQ-nyń baspasóz qyzmeti. Áskerı keńes barysynda «Semeı» shekaralyq jeke baqylaý áskerı bólimine jaýyngerlik tý tapsyryldy. Áskerı keńeske tóraǵalyq etken Ulttyq qaýipsizdik komıteti tóraǵasynyń orynbasary – Shekara qyzmeti dırektorynyń mindetin ýaqytsha atqarýshy polkovnık Darhan Dilmanov áskerı keńes múshelerin kún tártibimen tanystyra kele, byltyrǵy jyly qol jetkizilgen negizgi tabystarǵa toqtaldy. Áskerı keńes músheleri 2014 jylǵy áskerı-jaýyngerlik qyz­met­tegi tabystar, materıaldyq-teh­nı­kalyq qamtamasyz etilý ba­ry­sy jáne áskerı tártip máse­lesi­ne keńinen toqtaldy. Atap aıt­qan­da, byltyrǵy jyly shekarashy­lar qyzmetinde kontrabandany anyqtaý, esirtkini ustaý derek­teri­niń jıilegendigi aıtyldy. О́tken jyl ishinde 24 myńnan astam quqyq buzýshylyq anyqtalypty. Júk­terin kontrabandalyq jolmen ótkizýge tyrysqan 673 derek tirkelipti. Al tárkilengen júkter­diń salmaǵy 2 myń tonnany qurasa, 1,5 tonnaǵa jýyǵy esirtki zattary, onyń 96,8 kılosy «geroın». Kaspıı teńizinde arnaıy saýyqtyrý is-sharalary ótkizilip, onyń barysynda 144 júzý qural­dary, 4 myń dana bekire balyǵy, 1 myń dana bekire tuqymdas ba­lyqtar, 200 shaqyrymǵa jýyq qar­maqty quraldar, 280 shaqyrym aý quraldary tárkilengen. Atalǵan zań buzýshylyqtar boıynsha 190 qylmystyq is qozǵalypty, sol boıynsha 10 394 azamat aıyppul jazasyna kesilgen. Jalpy salynǵan aıyppuldyń somasy 168 mln. 888 myń teńgeni quraıdy. Shekara qyzmetin qarý-jaraq, tehnıka quraldary jáne basqa da arnaýly quraldarmen jabdyqtaý isi jalǵastyryldy. Onyń ishinde «An-74T-200A» ushaǵy, «Mı-171Sh» dep atalatyn 2 birdeı kóliktik áskerı tikushaq satyp alynǵan. 9 áýe kemesi zaman talabyna saı jóndelip, jańǵyrtyldy. Osynyń nátıjesinde, túngi kórý quraldary arqyly túngi barlaý jumystaryna shyǵýǵa múmkindik ashyldy. Avıasııanyń tasymaldaý qýaty da artty. Kaspııdegi teńiz shekarasyn kúzetý isine «Aıbar» jo­ba­sy boıynsha jasalǵan keme paı­dalanýǵa berilgendigin erekshe atap ótken jón. Shekarashylardyń avtopark qyzmeti de aıtarlyqtaı jańartyldy. 477 dana avtomobıl men ınjenerlik-jol tehnıka­lary satyp alyndy. Medısı­na­lyq qyzmet kórsetý isin jaqsar­tý maqsatynda byltyrǵy jyly rentgenologııalyq jáne stoma­tolo­gııalyq keshender alyndy. – О́tken jyl geosaıası jáne álemdik ekonomıka salasynda ózgeristerge toly boldy. Jańadan qaýip-qater aımaqtary paıda boldy. Terrorıstik jáne ekstremıstik uıymdar tarapynan qaýip-qater kóbeıdi. Atalǵan qaýip-qaterlerge toıtarys berý qajettigi Memleket basshysy Nursultan Nazarbaevtyń «Nurly Jol – bolashaqqa bastar jol» atty Joldaýynda naqty aıtylǵan. Elbasynyń tapsyrmasyn oryndaý úshin barlyq kúsh-jigerimizdi biriktirýimiz kerek. Shekara qyzmeti Ulttyq qaýipsizdik komıtetiniń quramdas bóligi bolyp tabylady, sondyqtan atqaratyn mindetteri de ortaq, ol – elimizdiń ulttyq qaýipsizdigin qamtamasyz etý. Osy mindetti oryndaý jolynda barlyqtaryńyzǵa tabys tileımin, – dep atap ótti óz sózinde UQK tóraǵasy Nurtaı Ábiqaev. Keńes barysynda úzdik shekara otrıadtary, úzdik zastavalar jáne úzdik shekarashylar anyqtalyp, marapattaldy.