Táýelsiz sarapshynyń sapary

BUU-nyń arnaıy baıandama­shysy Maına Kıaı keshe Qazaq­stanǵa keldi. Ol elimizde 27 qańtarǵa deıin bolady. Sapary barysynda Kıaı Qazaqstandaǵy beıbit jınalystar men erkin birlestikter quqyǵy qalaı júzege asyrylyp jatqanyn baǵalaıdy. Bul mandaty BUU-nyń Adam quqyqtary jónindegi keńesiniń qararyna sáıkesetin táýelsiz sa­rap­shynyń Qazaqstanǵa al­ǵash­­qy sapary bolyp taby­lady. «Beı­bit jınalystar men er­kin bir­lestikterge quqyq berý demokra­tııa men damýdyń ajyra­mas bir bólshegi bolyp tabylady. Mem­­leket osy quqyq­tardy to­lyq kó­leminde qurmetteýi jáne qor­­ǵaýy tıis», deıdi táýelsiz sarapshy. Maına Kıaı sapary bary­synda beıbit jınalystar ótkizý Qazaqstanda qaı deńgeıde júzege asyrylatynymen tanysatyn bolady. Budan bólek, ol qoǵamdyq birlestikter, kásibı odaqtar, saıası partııalar men dinı birlestikter qalaı tirke­letini máselelerin zerttep kór­mek. Sonymen qatar, jaqynda qabyl­danǵan jańa Qylmystyq kodeks pen Ákimshilik quqyq buzýshylyq týraly kodeks haqynda aqparat alý nıeti bar eken. Memlekettiń shaqyrýy bo­ıyn­sha elimizge kelip otyrǵan Kıaı myrza keshe Almaty qala­synda boldy. Ol Almaty qalasy ákiminiń orynbasary S.Amanjolovamen, Ishki saıasat basqarmasynyń basshysy S.Bo­qaevpen jáne Almaty qala­lyq ádilet departamentiniń bas­shysy D.Aıtmuhametovpen kez­desti. Sonymen qatar, Almaty qala­sy mamandandyrylǵan aýdanara­lyq ákimshilik sotynyń tór­aǵasy B.Tájihanovpen jáne Almaty qalasynyń prokýrory B.Asylovpen júzdesti. Kezdesý­lerde sherý, mıtıngter ótkizý máseleleri jan-jaqty sóz boldy. Tutastaı alǵanda, kezdesýler jaqsy ótti jáne taraptar arasynda eshqan­daı kelispeýshilikter men túsinis­peý­shilikter oryn alǵan joq. Maına Kıaı erteń Astanaǵa keletin bolady. Onyń sondaı-aq, Aqtaý jáne Jańaózen qalalaryna sapary josparlanǵan. Onda ol mem­lekettik organdar, sot or­gan­dary jáne azamattyq qoǵam uıym­dary ókilderimen kezdesetin bolady. BUU-nyń táýelsiz sarapshysy óziniń saparyn Bas Uıymnyń adam quqyqtary jónindegi usynymdamalary men ony júzege asyrýdyń basqa da tetikteri qalaı oryndalyp jatqanyn óz kózimen kórip talqylaýǵa jaqsy múmkindik dep qarastyryp otyr. Táýelsiz sarapshy óziniń Qazaqstanǵa sapary týraly naqty esebin aldaǵy maýsym aıynda ótetin BUU-nyń Adam quqyqtary jónindegi keńesi sessııasynda usynatyn bolady. «Egemen-aqparat».