Qazir elimizde memlekettik qyzmetke irikteýdiń jańa júıesin kezeń-kezeńimen engizý qolǵa alynyp keledi. Mundaǵy basty maqsat – memlekettik qyzmettiń ımıdjin arttyrý, kadrlyq áleýetti damytý jáne jas kadrlardy tartý. Bul máselege jan-jaqty toqtalǵan Memlekettik qyzmet isteri agenttiginiń Soltústik Qazaqstan oblystyq departamentiniń basshysy Dýlat Taıshybaı: «Jastar – elimizdiń basty strategııalyq resýrsy. Memlekettik qyzmetshiler qatarynda bilimdi, ózin-ózi damytýǵa daıyn jastar kóp. Oblystyń memlekettik organdarynda 4 myńǵa jýyq memlekettik qyzmetshi jumys isteıdi, sonyń 30%-y 35 jasqa deıingi jastar», dedi.
Onyń aıtýyna qaraǵanda, Prezıdenttiń memlekettik qyzmetke turý prosedýrasyn ońaılatý boıynsha bergen tapsyrmalaryna sáıkes «B» korpýsynyń E-R-1, E-R-2, E-R-3 sanattaryndaǵy laýazymdaryna qoıylatyn biliktilik talaptary ózgergen. Qazir bul laýazymdarǵa orta bilimnen keıingi nemese tehnıkalyq jáne kásiptik bilimi bar azamattar jiberiledi. E-R-4 sanatyndaǵy aýdandyq nemese qalalyq jergilikti atqarýshy organdardyń bas mamandarynyń laýazymdaryna ornalasýǵa qoıylatyn talaptar da jeńildetilgen. Endi burynǵydaı joǵary bilim talap etilmeıdi, orta bilimnen keıingi nemese tehnıkalyq jáne kásiptik bilimniń bolýy jetkilikti.
Qazir jastar úshin bos memlekettik ákimshilik laýazymdarǵa konkýrstan tys ornalasýdyń biregeı múmkindikteri jasalyp otyr. Atap aıtqanda, GPA 3,33 kórsetkishimen memlekettik grant esebinen oqýyn aıaqtaǵan joǵary oqý oryndarynyń túlekteri konkýrstyq irikteýsiz jáne testileýsiz belgili bir memlekettik laýazymdarǵa ornalasa alady. Ondaılardyń qataryna aýdannyń nemese oblystyq mańyzy bar qalanyń ákimi men máslıhat apparattarynyń tómengi laýazymy, osylardyń atqarýshy organdarynyń basshy emes laýazymy, t.b sol sııaqty qyzmetter jatady.
Qazir oblysta Manash Qozybaev atyndaǵy ýnıversıtettiń 7 túlegi osy jolmen laýazym konkýrstan tys taǵaıyndalǵan. Taǵy 2 túlektiń kandıdatýrasy kelisilip jatyr. «Byltyr «Dıplommen – aýylǵa!» baǵdarlamasymen jas mamandarǵa turǵyn úı satyp alýǵa nemese jańadan salýǵa jeńildetilgen kredıt berilip, kóterme járdemaqy tólendi. Keıingi 4 jylda aýyldyq jerlerde jumyspen qamtylǵan barlyq 60 jas qyzmetshige bıýdjettik kredıt pen kóterme járdemaqy berildi», dedi D.Taıshybaı.
Daryndy jastardy tartý úshin memlekettik qyzmet isteri departamentiniń qasynan 2018 jyldan beri biliktilik mektebi jumys isteıdi. Oǵan joǵary jáne kásiptik-tehnıkalyq oqý oryndarynyń belsendi stýdentteri tartylǵan. Ashylǵan ýaqyttan bergi 9 maýsymda mekteptiń 37 stýdenti Akademııa fılıaldarynda daıyndyq baǵdarlamasymen memlekettik organdarda óndiristik tájirıbeden ótken. Endi zańnamany bilýge jáne jeke qasıetterin baǵalaýǵa testileýden ótýleri tıis, sodan keıin memlekettik sektordaǵy talanttar pýlyna qabyldaý týraly sertıfıkat alady.
Bıyl 1 shildeden bastap oblysta memlekettik qyzmetke kirý boıynsha jańa qanatqaqty joba synaqtan ótedi. Bul joba birqatar oblys pen memlekettik organda sátti júzege asyrylǵan. Jańa format úmitkerlerge konkýrstyń barlyq kezeńine, josparlanǵan ýaqytta jáne eldiń kez kelgen jerinen qatysýǵa múmkindik beredi.
Memlekettik qyzmetke alǵash kirgender úshin tálimgerlik ınstıtýt qurylady. Bul burynnan bar tájirıbe bolsa da elimiz naryqtyq qatynasqa ótken kezeńnen beri umytylǵan. Endi ómir onyń oń tájirıbe ekenin kórsetip otyr. Memlekettik qyzmettegi eńbek jaǵdaılaryna beıimdelýi úshin jańa qyzmetshige synaq merzimi beriletindigi de óte mańyzdy.
Prezıdenttiń 2015 jylǵy 29 jeltoqsandaǵy Jarlyǵyna túzetýler engizilip, sonyń arqasynda tórt toqsan ishinde qatarynan joǵary baǵa alǵan qyzmetshilerdi joǵary turǵan laýazymǵa tikeleı taǵaıyndaýǵa bolady. Buryn joǵary laýazymǵa ótý úshin qaıtadan testileýden ótkiziletin. О́z kezeginde, eki toqsan qatarynan qanaǵattanarlyqsyz baǵa alǵan qyzmetshilerdiń laýazymy tómendetiledi, bos laýazym bolmaǵan jaǵdaıda jumystan shyǵarylady.
«Qazirgi tańda memlekettik qyzmettiń О́ńirlik kadr rezervine irikteý júrgizilip jatyr. Onyń qatysýshylary – irikteý kezeńderinen ótken oblystyń 35 jasqa deıingi jastary. Qorytyndy qyrkúıek aıynda shyǵarylady», dedi sóziniń sońynda D.Taıshybaı.
Soltústik Qazaqstan oblysy
