Shettiń sharýaqor ákimi

Muhıt Saılaýuly basqa­ra­tyn óńir – halyq sanynan da, jer bederi jaǵynan da eń úlken aýdan. Muhıttyń Shetke ákim bolyp kelgenine tórt jyldan asty. Endi ǵana ákim bop taǵaıyndalǵan edi, kovıd indeti kóp sharýany irkidi. Biraq aýyl-aımaqtaǵy máselelerdiń bárin ishten biletin Muhıt Saılaýuly aýdan ınfraqurylymyn damytamyn dep óz-ózine ýáde bergen. Prezıdenttiń aýyldy kóterý jónindegi pármenderin, oblys basshysynyń osy turǵydaǵy tapsyrmalaryn sátti oryndap otyr.

Aýdan basshysy – osy óńir­de ósip-óngen azamat. Eńbek jolyn osyndaǵy ákim­shilikten bastaǵan ol mem­le­kettik qyzmettiń bir­ne­she baspaldaǵynan ótedi. Al­ǵashqy eńbek joly da qyzyq bastalady. Ákesi qalada júr­gen ulyn jumysqa ornalas­tyramyn dep, aýylǵa shaqy­ryp alady. Sol kezde aýdan ákiminiń orynbasaryna júr­gizýshi qajet bolyp, oǵan óti­nish jazady. Ákimshilik qyzmetkerleri Muhıt Saı­laýulynyń «ınjener-meha­nık» mamandyǵy boıynsha dıplomy baryn kórip, óndiris bólimine maman bolyp ótinishin qaıta jazdyrady. Sol kezden bastap, memlekettik qyzmettiń qazanynda qaınaıdy. Tájirı­be jınaqtaıdy. Qurylys, sáýlet jáne kommýnaldyq sha­rýashylyq bóliminde de eseli eńbek etedi. Ábden qyzmettiń mashaqatyn sezingen mamanǵa ónerkásip jáne kásipkerlik bólimin tapsyrady. Ony da oıdaǵydaı basqarady. Kele-kele aýdan ákimi apparatyna jetekshilik etedi. Qazirgi basshylyq qyzmetine deıin aýdan ákiminiń orynbasary bolady. Sóıtip, 1997 jyldan beri memlekettik qyzmettiń ystyq-sýyǵyn kórip keledi.

Áý basta aıta ketkenimizdeı, jańa taǵaıyndalǵan ákimniń aldynda ınfraqurylymdy damytý arqyly aýdan jurt­shylyǵyna ıgilik syılaý min­deti turdy. Qyzmetine kiri­se salysymen Burma aýy­lyndaǵy sý qubyryn qaıta jańartady. Aqsý, Qyzyltaý, Aqbaýyr, Qyzylqoı, Beket, Er­kindik, Aqoı, О́spen aýlyna sý qubyryn tartady. «Qýatty óńirler – el da­mýynyń draıveri» Ulttyq jobasy aıasynda birneshe aýyl jurty sapaly aýyz sý­men qamtylady. Al bıyl Ulttyq qordan 310 mln teńge kóleminde qarjy bólinip, Aqsý-Aıýly aýyldyq okrýginiń Eńbekshil aýlynda taza aýyz­sý júıesiniń qurylysy bas­taldy. Bul jumys keler jyly aıaqtalyp qalady. Mu­nymen bul baǵyttaǵy jumys toqtap qalmady. Kók­tińkóli okrýgine qaras­ty 56-razezd ben Álıhan aýyl­daryna sý qubyry tartyla­dy. Jobanyń smetalyq qujattary toly­ǵy­m­en jasaldy. Bıyl Shopa, K.Myńbaev, Qarmys, Aqtó­be, Qaıraqty aýyldaryna keshendi-blok modýli qoıy­la­dy. Aqshataý kentine sý ny­sanyn ornatýǵa 20 mln qa­rastyrylyp otyr.

Jol máselesi de jolǵa qo­ıylyp keledi. Aýdan ortalyǵy Aqsý-Aıýly aýylynyń úsh basty kóshesine asfalt tóseldi. «Aýyl – el besigi» jobasy aıasynda kóptegen aýyldyń ishi asfalttaldy. Infraqurylymmen ıgilik ákelemin degen negizgi kúsh salǵan jumystary – osy.

Aýdan ákimi kommýnaldyq sharýashylyqtyń qyr-syryn ábden meńgerip alǵan. Máselen, aýdan ortalyǵynda buryn-sońdy múldem bolmaǵan káriz júıesiniń qurylysy bas­tal­ǵa­ly tur. Qazir elektr je­lileri tartylyp jatyr. Keler jyly qurylys jumysy aıaq­talyp, el-jurt ıgi­ligin kóredi. El arasynda bul da Muhıt ákimnen qalǵan izgi iz bolyp aıtylady.

Bilýimizshe, Muhıt myrza únemi aýyl-aýyldy aralap, tóselip jatqan asfaltty, sa­lynyp jatqan áleýmettik mańyzy bar nysandardyń jumysyn qadaǵalap kelýdi qaǵıdat etip alǵan. Taǵy bir ereksheligi – joba qujattaryn jatqa soǵady. Salynyp jat­qan mektep, FAP, sport kesheni, jol bolsyn, qansha qarajat bólingeni, merdiger uıym­ǵa berilgen merzimdi, qury­lys materıaldary sekil­di qajettilikterdiń bárin bir oqyp ótkennen-aq, sanasyna saqtap alatyn qabileti bar.

Muhıt ákimniń el basqarý­da­ǵy taǵy bir tıimdi tetigi – iri ınvestorlar tartýynda. Sol arqyly ol halyqtyń ál-aýqa­tyn jaqsartyp, aýdan ekonomıkasynyń damý dınamıkasyn joǵarylatatyn edik deıdi. О́zi qyzmetke kiriskeli beri aýdan boıynsha jumys istep turǵan kásiporyndardan bıýdjetke 207,5 mlrd teńge kóleminde ınvestısııa quıyl­ǵan. Aldaǵy 2024-2026 jyly ınvestısııalyq jobalardan 130 mlrd teńge kapıtalǵa túsedi deıdi.

Aýdan kóleminde medısına, bilim, mádenıet, sport salasy boıynsha da atqarylyp jatqan jumystar aýqymdy. Bizdiń Muhıt ákimniń el basqa­rýdaǵy basty baǵytyn jetkiz­gimiz keldi. Ol – jol men sý.

– Shyny kerek, jıyn-toı­lardan góri ózimdi el ishinde júrgende erkin sezinemin. Ká­dimgi qaınap jatqan jumys­tardyń bel ortasynda júrip, olardy baqylap júrgen unaı­dy. Múmkin, memlekettik qyzmettegi jyldar barysynda sony kórip shyńdalǵannan bolar. Únemi aýyldardy ara­laımyn. Kabınette qama­lyp otyrǵannan, jumys ón­beıtindeı kórinedi. О́nbeıdi de. Eldi kóterý eń áýeli aýyldy kóterýden bastalady. Bizdiń moınymyzda osyndaı úlken júk tur. Aýyl jurtynyń suraı­tyny – aýyzsý men jol. Áli de atqaratyn jumysymyz kóp, máselemiz de jeterlik, – deıdi ákim.

Ákim baspana máselesin sheshýdi kún tártibinen túsir­meıdi. Aqadyr kenti men Aqsý-Aıýly aýylyndaǵy úı kezegin azaıtsaq degen armany bar. Sol sebepti de jyl saıyn jańa úıdiń kiltin kezekte turǵandarǵa tabystaıdy. Aqsý-Aıýly aýlynyń shetinen jańa shaǵyn aýdan boı kóterýde. Qaz-qatar jańa úıler salynyp, baspana kezegi birtin-birtin qysqara beredi.

«Ákim bolýdyń qıyndyǵy aldyńa kómek surap kelgen janǵa qol ushyn bere almaı, máselesin sheshe almaǵanyńda qatty seziledi. Sheshkiń kel­megendikten emes, shynymen qolyńnan kelmeı qalatyn kez bolady. Aldymyzǵa úı surap kelgen analardyń janaryn kórip janyń aýyrady. Sol sebepti qandaıda bir qarajattyń kózin taba qalsaq, turǵyn úı máselesin sheshýge buryp jatyrmyz. Barymyzdy baspana kezegin azaıtýǵa salamyz», deıdi Muhıt Saılaýuly.

Ras, jalpy ákim ataýlyǵa júktelgen mindet jetip artylady. Munshama mindetti minsiz atqara bilý ekiniń biri­niń qolynan kelmeıdi. Aýdan basshysynyń moınynda qan­shama qazaq aýlynyń senimi jatyr. Sol senim údesinen shyǵa bilýdi sert etken Muhıt Saılaýulynyń ákim bolyp, el basqarýdaǵy baǵytyn biz osylaı baǵamdadyq. Baǵa­syn halyq beredi.

«Shyny kerek, memle­ket­tik qyzmette júrip, bala­la­ry­myzdyń qalaı ósip ketkenin bilmeı qaldyq», deıdi ákim. Ákim­niń jary Seker Qojan­qyzy da áleýmettik salada uzaq jyl qyzmet etken. Keıin úıdegi balalaryna kó­ńil bóleıin dep jumysyn toq­tatady. Muhıt Saılaýuly ekeýi alty bala tárbıelep otyr. Uldary Nurdáýlet – qa­zaq kúresi jáne dzıýdodan sport sheberine úmitker. Boz­kilemde beldesip júr. Bul qasıet ákim ákesinen daryǵan dese de bolady. О́ıtkeni jas kezinde bokspen aınalysqan. Al qazir úıinde kúnara temir-tersek kóterip, jattyǵady. Sport – serigi. Qoly qalt etkende bılıard oınaıdy. Bul oıyn adam oıyn utqyrlyqqa, dál­dikke shynyqtyryp, bo­ıyn sergitedi. Sondyqtan bolar, Shet aýdanynyń sharýager ákimi qaı istiń basynda bolmasyn sergek júredi.

Qaraǵandy oblysy,

Shet aýdany