Foto: gov.kz
Úkimet málimetinshe, tórtinshi apta qatarynan elde 10 taýar baǵasy tómendep jatyr: qaraqumyq jarmasy – 0,9%, kúnbaǵys maıy – 0,5%, qyryqqabat – 0,4%, sıyr eti, tuz jáne qant – 0,3%, kúrish – 0,2%, makaron, súzbe jáne un – 0,1%. Saýda jáne ıntegrasııa birinshi vıse-mınıstri Aıjan Bıjanova baǵa 8 oblysta tómendep, onyń ishinde Ulytaý (0,8%), Aqtóbe (0,6%) jáne Atyraý (0,5%) oblystarynda aıtarlyqtaı arzandaǵanyn aıtty. Jalpy, bir apta ishinde áleýmettik azyq-túlik baǵasynyń ortasha ındeksiniń tómendeýi – 0,1%.
Aýyl sharýashylyǵy vıse-mınıstri Erbol Tasjúrekov óńirlerde erte ónim jınaý kelisimshartynyń barysyn ortaǵa saldy. Úsh megapolıs – Astana, Almaty, Shymkent – maýsymaralyq kezeńde kókónisterdi turaqty baǵamen jetkizý úshin eldiń jeti óńirinen aýyl sharýashylyǵy óndirýshilerimen tikeleı kelisimsharttar jasaı bastady.
«Astana qazirdiń ózinde 15 myń tonna kókóniske: kartop, pııaz, qyryqqabat, sábizge forvardtyq kelisimsharttar jasasty. Shymkent – 7,5 myń tonnaǵa, Almaty – 16 myń tonnaǵa. Jetkizý maýsym-shilde, qyrkúıek-sáýir aralyǵyna josparlanǵan. Sondaı-aq kúzgi ónimdi jetkizýge qosymsha forvardtyq sharttar jasalady», dedi Erbol Tasjúrekov.
Sondaı-aq Erbol Tasjúrekov óńirlerge áleýmettik mańyzy bar azyq-túlik taýaryna baǵany turaqtandyrý tetikterin iske asyrý qaǵıdalarynda belgilengen qarjylandyrý merzimi men sharttaryn, onyń ishinde aýyl sharýashylyǵy taýaryn óndirýshiler men qaıta óńdeý kásiporyndaryn qarjylandyrýdyń 70% baǵyty boıynsha talaptardy saqtaý qajet ekenin atap ótti.
