Foto: kaz.inform.kz
Elimizge alǵashqy resmı saparymen kelgen maltalyq meımanǵa alǵys bildirip, kelgen qadamyna qut tilegen Murat Nurtileý Malta syrtqy saıasat vedomstvosy basshysynyń elimizge jasaǵan alǵashqy resmı saparyna erekshe mán beretinimizdi atap ótti.
«Eýropadaǵy qaýipsizdik jáne yntymaqtastyq uıymynyń qazirgi tóraǵasy Astanaǵa elimizdegi jaýapty kezeńde kelip otyr. Elimiz aıtarlyqtaı demokratııalyq jetistikterge qol jetkizip, Ádiletti Qazaqstan qurý jolynda keledi. Biz búgingi sapardy Memleket basshysy Qasym-Jomart Toqaev bastamashylyq etken irgeli saıası, áleýmettik-ekonomıkalyq reformalarymyzdy qoldaýdyń aıqyn kórinisi dep esepteımiz. Tuǵyry berik, ekonomıkasy myǵym, halyqaralyq saıası arenadaǵy bedeli barynsha moıyndalǵan Malta búginde Eýropalyq odaqtaǵy Qazaqstannyń mańyzdy da senimdi seriktesi bolyp otyr. Elderimiz arasyndaǵy dıplomatııalyq qatynastar osydan otyz bir jyl buryn ornatylǵan. Keıingi kezde Astana men Valletta arasyndaǵy saıası dıalogtiń damýy qarqyn ala bastady», degen M.Nurtileý ekonomıkalyq jáne mádenı-gýmanıtarlyq yntymaqtastyqtyń da bolashaǵy orasan zor ekenine toqtaldy.
«Saýda-ekonomıkalyq áleýetimizdi tolyq paıdalaný maqsatynda mınıstr Borchpen týrızm, óńdeý, jer qoınaýyn barlaý, teńiz logıstıkasy sııaqty perspektıvaly sektorlar boıynsha jumysty jandandyrýdy ýaǵdalastyq. Qazaqstan azamattary úshin Eýropalyq odaqtyń vızalyq rejimin jeńildetý máselesine bólek toqtaldyq. Bizdiń oıymyzsha, onyń oń sheshilýi san qyrly baılanystardyń belsendi damýyna zor septigin tıgizer edi», dedi M.Nurtileý.
Murat Ábýǵalıuly sondaı-aq EQYU tóraǵasymen óńirlik jáne jahandyq kún tártibindegi ózekti taqyryptar boıynsha jan-jaqty pikir almasqanyn jetkizdi. Oǵan qosa kóptegen halyqaralyq máseleler boıynsha elderimizdiń ustanymdary uqsas ári jaqyn ekenin atap ótti.
«Elimizdiń bıylǵy birqatar iri halyqaralyq uıymdaǵy tóraǵalyǵy barysyn ortaǵa saldyq. Sondaı-aq Helsınkı Qorytyndy aktisi qabyldanǵanynyń 50 jyldyǵy qarsańynda, Eýropadaǵy qaýipsizdik jáne yntymaqtastyq uıymynyń róli men bedelin arttyrý joldaryn qarastyrdyq. Qazirgi qalyptasqan geosaıası ahýal kezindegi Uıymda bolǵan ınstıtýsıonaldy daǵdarysqa qaramastan, biz onyń áserin báseńdetý maqsatynda keshendi jumys júrgizip otyrmyz. Osydan on tórt jyl buryn qabyldanǵan Astana deklarasııasynyń qaǵıdattary óz ózektiligin joǵaltpaı, jyldan-jylǵa mańyzdylyǵyn saqtap keledi. Búgin de Valletta uıymǵa tóraǵalyq etip, osy jaýapty mindetti úlken abyroımen atqaryp otyr», dedi M.Nurtileý.
Kezdesý barysynda maltalyq áriptesimen dıalogke arnalǵan biregeı platformany Helsınkı aktisi men Astana deklarasııasy rýhynda odan ári damytý jaıynda keliskenderin atap ótti.
Ian Borch aldymen elimizdegi tasqyn sý saldarynan bolǵan qıyn jaǵdaıǵa baılanysty bizdiń halyqqa kóńilin bildirdi.
«Adam shyǵyny bolyp, turǵyn úılerdi jermen-jeksen qylǵan jáne mal-múliktiń qyrylýyna ákelgen kóktemdegi sý tasqynynan zardap shekken Qazaqstan halqyna shyn júrekten kóńil aıtamyn. Sabyrlylyq, shydamdylyq pen tózimdilik tanytqan qazaq halqyn joǵary baǵalaımyz. EQYU sizdermen yntymaqtastyqty qalaıdy jáne Qazaqstandy qoldaýǵa nıetti», dedi EQYU tóraǵasy.
Sondaı-aq ol Astananyń mereıtoılyq deklarasııasy qashanda EQYU tarıhyndaǵy irgetas bolyp qala beretinin erekshe atap ótti. 2010 jylǵy Astana sammıtiniń sátti ótkenin aıtty. Sonymen qatar Qazaqstannyń qaýipsizdiktiń úsh ólsheminde mańyzdy oryn alatynyn, belsendi ról atqaratynyn atap ótti. Jer daýymen áskerı qaqtyǵysqa deıin baryp, áýre-sarsańǵa túsken Ázerbaıjan men Armenııa arasyndaǵy beıbit kelisimderdiń ornyǵýyna járdem berip, araǵaıyndyq tanytqan elimizdiń halyqaralyq bedeline de joǵary baǵa berdi.
