Kollajdy jasaǵan – Qonysbaı ShEJIMBAI, «EQ»
Ulttyq testileý ortalyǵynyń Qostanaı qalasyndaǵy fılıal basshysy Nurgeldi Hasenovtiń aıtýynsha, bıyl talapkerler negizgi UBT-ny eki ret tapsyryp, sonyń eń úzdik nátıjesimen grant konkýrsyna qatysa alady. Talapkerler testileý kúnin, ýaqytyn jáne test tapsyratyn oryndy ózderi tańdady.
«Bıyl balalar úsh mindetti jáne tańdaý boıynsha eki pánnen test tapsyrady. «Oqý saýattylyǵy» men «Matematıkalyq saýattylyq» mindetti pánderinen tapsyrmalar sany 5 suraqqa qysqardy. Bul beıindik pánder boıynsha suraqtar sanyn 40-qa deıin arttyrýǵa múmkindik berdi. Sonymen qatar beıindik pánderde berilgen tizimnen sáıkestikti anyqtaýǵa arnalǵan 5 tapsyrma qosyldy. UBT tapsyrmalarynyń sany – 120 suraq. Onyń ishinde «Qazaqstan tarıhynan» 20 tapsyrma, «Oqý saýattylyǵynan» 10 tapsyrma, «Matematıkalyq saýattylyqtan» 10 tapsyrma jáne eki beıindik pán boıynsha 40 tapsyrma. Joǵary ball – 140, ol da ózgerissiz qaldy», deıdi Nurgeldi Hasenov.
UTO basshysynyń aıtýynsha, testileýdiń jalpy ýaqyty – 4 saǵat. Sonymen qatar erekshe bilim berý qajettilikteri bar balalarǵa qosymsha 40 mınýt ýaqyt beriledi. Al kórý qabileti buzylǵan balalardyń yńǵaıy úshin syzba jáne dıagrammalarsyz suraqtar ázirlengen.
«Qazir jalpy testileý qańtarda, naýryzda, maýsym, shilde, tamyz aılarynda – jalpy jylyna bes ret ótedi. Osyǵan baılanysty balalar test tapsyrýǵa psıhologııalyq turǵydan ábden daıyn bolyp keledi. Sondyqtan 5 ret test tapsyrǵan, eń aldymen, balalardyń ózderi úshin jaqsy. Qazir balalar men ata-ananyń boıynda burynǵydaı qorqý, tolqý, qobaljý joq. Ábden úırenip aldy», deıdi Ulttyq testileý ortalyǵynyń basshysy.
Nurgeldi Sálimjanulynyń aıtýynsha, sońǵy jyldary UBT tapsyrýshylar arasynda tártip buzýshylyq kóp azaıǵan. Máselen, Qostanaı qalasyndaǵy UTO-da osy ýaqytqa deıin tártip buzý jaǵdaıy eki-aq ret tirkelgen. Bir bala qaǵazǵa jazylǵan daıyn jaýapty kóshirmek bolǵan, ekinshisi testileý ortalyǵyna uıaly telefon alyp ótpek bolǵan.
Qostanaı oblysy
