Máýlen Áshimbaev jýrnalıster qaýymyn quttyqtaı kele, buqaralyq aqparat quraldary Ádiletti Qazaqstan qurý baǵdaryn iske asyrýǵa belsendi qatysyp kele jatqan mańyzdy ınstıtýttardyń biri ekenin aıtty. Senat cpıkeri jýrnalısterdiń parlamenttik pýly zań shyǵarýshy organ men qoǵamdy baılanystyratynyn tilge tıek etti. Sondaı-aq ol elimizde bolyp jatqan oqıǵalar, Memleket basshysynyń bastamasymen qolǵa alynǵan reformalar, senatorlardyń jumysy jáne zańnamalyq ózgerister men qabyldanǵan sheshimder jaıynda aqparat taratyp, olardyń mańyzyn halyqqa dáıekti túrde jetkizip júrgen tilshiler qaýymy memlekettiń damýyna úlken úles qosyp otyrǵanyna toqtaldy.
– Sońǵy jyldary elimizde Memleket basshysynyń bastamasymen Ádiletti Qazaqstan qurý jolynda aýqymdy jumys atqarylyp jatyr. Prezıdent Qasym-Jomart Toqaev atap ótkendeı, bul – barsha otandastardyń aldynda turǵan mańyzdy mindet. Osyǵan baılanysty keshendi saıası, ekonomıkalyq, áleýmettik reformalar iske asyrylyp keledi. Ulttyq qundylyqtardy dáripteý, ıdeologııa baǵytynda da mańyzdy qadamdar jasalýda. Memleket basshysy Ulttyq quryltaıdyń úshinshi otyrysynda osy saladaǵy negizgi basymdyqtardy belgilep berdi. Sol qaǵıdattardy jáne atqarylyp jatqan jumystar men qabyldanǵan zańdardy halyqqa jetkizip, olardyń mánin túsindirýde buqaralyq aqparat quraldary qyzmetkerleriniń eńbegi aıryqsha, – dedi M.Áshimbaev.
Senat jumysyndaǵy basym baǵyttardyń biri – óńirlerdiń damýyna yqpal etý. Sondaı-aq jergilikti ókildi jáne atqarýshy organdarmen birlesip ózekti problemalardy sheshý. Osy oraıda M.Áshimbaev buqaralyq aqparat quraldarynyń bolǵan oqıǵany jedel ári obektıvti jarııalaýy, senatorlardyń depýtattyq saýaldary boıynsha sıýjetteri men maqalalary, turaqty komıtetterdiń qyzmeti men qabyldanyp jatqan zańdary týraly taldamalyq materıaldary asa mańyzdy ekenin basa aıtty. Sondyqtan senatorlar BAQ ókilderimen baılanysty odan ári nyǵaıtýǵa múddeli ekenin jetkizdi.
– Parlament osy sessııada 100-ge jýyq zań qabyldady. Barlyq zań halyqtyń ómir súrý sapasyn arttyrýǵa, elimizdi odan ári damytýǵa jáne azamattarymyzdyń quqyqtaryn qorǵaýǵa arnalǵan. Osy rette áıelderdiń quqyqtary men balalardyń qaýipsizdigin qorǵaýǵa, qoǵamdyq baqylaýdy arttyrýǵa jáne memlekettik satyp alý júıesin jetildirýge arnalǵan zańdardy erekshe atap ótken jón.
Mańyzdy normalardyń qatarynda «Mass-medıa týraly» zań da bar. Bul qujat mass-medıa salasyndaǵy zańnamany júıeli túrde jetildirýdi kózdeıdi. Zań shyǵarý qyzmetimen qatar Senat mańyzdy máselelerge arnalǵan Úkimet saǵattary, Parlamenttik tyńdaýlar, dóńgelek ústelder jáne halyqaralyq is-sharalar ótkizdi. Senatorlardyń óńirlerge saparyn da aıryqsha atap ótken jón. Osy jumystyń bárine ózderińiz de qatysyp, olardyń mańyzyn halyqqa jetkizip kelesizder. Senat árdaıym buqaralyq aqparat quraldarymen tyǵyz baılanysta jumys isteıdi. Aldaǵy ýaqytta osy baılanys odan ári artady dep senemin, – dep, M.Áshimbaev mereke qarsańynda BAQ ókilderine zor densaýlyq, baq-bereke jáne shyǵarmashylyq tabys tiledi.
Bıyl «Parasat» baıqaýyna qatysýǵa telearnalar, radıo, gazet, aqparat portaldary jáne basqa da medıadan elimiz boıynsha barlyǵy 120-ǵa jýyq jumys túsken. «Merzimdi baspasózdegi úzdik materıal» atalymy boıynsha «Egemen Qazaqstan» gazetiniń aǵa tilshisi Eskendir Zulqarnaı top jardy. Saltanatty is-sharada jýrnalıster atynan sóz alǵan Eskendir Zulqarnaı Senat pen mas-madıa ókilderi arasynda ashyq ta syndarly baılanys ornaǵanyn aıtyp, pikirin bildirdi.
– Bas qosyp otyrǵan kıeli shańyraqtyń el ómirindegi orny erekshe. Memleket basshysynyń árbir tapsyrmasy men bastamasyna zań júzinde qoldaý bildirip, onyń iske asýyna, el ómirine enýine Senat depýtattarynyń qosyp jatqan úlesi orasan. Mass-medıa ókili retinde aıtarym, Senat tóraǵasy men depýtattary jýrnalıster qaýymy úshin árdaıym ashyq. Biz kez kelgen ýaqytta pikir nemese suhbat alý úshin senatorlarǵa qońyraý shalǵanda, olar árdaıym bizge qoldaý bildirip, suraqtarymyzǵa jaýap beredi. Joǵarǵy palatanyń baspasóz qyzmetiniń de jýrnalıstermen júıeli jumys júrgizetinin atap ótkim keledi, – dedi ol.
Sondaı-aq osy atalymda «Nash Kostanaı» gazetiniń tilshisi Ekaterına Baınıasheva men «Aiqyn» gazetiniń ujymy úzdik tanyldy.
«Úzdik televızııalyq materıal» atalymyn «24kz» telearnasynyń Soltústik Qazaqstan oblysyndaǵy menshikti tilshisi Aıdarbek Balǵabekov, «Atameken Business» telearnasynyń tilshisi Farıza Bolatbek jeńip aldy.
«Internet-basylymdaǵy úzdik jarııalanymda» «QazAqparat» halyqaralyq aqparat agenttiginiń tilshisi Rýslan Ǵabbasov pen «Informburo.kz» aqparat agenttiginiń tilshisi Áıgerim Ýmmattyń mereıi ústem boldy.
«Áleýmettik jelilerdegi úzdik jazba» atalymyn «Jaqsy Bolady» Youtube-arnasynyń avtor-júrgizýshisi Bolat Buharbaı, «Abay Live» Youtube-arnasynyń avtor-júrgizýshisi Abaı Tilenshıev, «Drýgıe mesta» bloginiń avtory Renat Tashkınbaev ıelendi.
«Úzdik radıomaterıal» júldesi «Qazaq radıosynyń» tilshisi Almas Baıdrahmanovqa berildi. Jyldyń arnaıy syılyǵy – «Úzdik analıtıkalyq materıal» boıynsha «Qazaqstan» ulttyq telearnasynyń tilshisi Amangeldi Seıithan, «Tengrinews.kz» aqparattyq ınternet-portalynyń tilshisi Arýjan Dáribaı, «Kazahstanskaıa pravda» gazetiniń tilshisi Laýra Túsipbekova tanyldy.
