Bul stýdentterdiń kópshiligi óndiristik tájirıbeni «Egemen Qazaqstan» gazetiniń redaksııasynda ótken bolatyn. «Qazaq gazetteri» JShS bas dırektorynyń orynbasary Qambar Ahmet jýyrda qabyldanǵan «Mass-medıa týraly» zańnyń artyqshylyǵy men medıa óristegi jańashyldyq týraly sóz qozǵady. «Egemen Qazaqstan» gazetiniń bas redaktory Ǵabıt Músirep qazaq jýrnalıstıkasynyń qara shańyraǵy sanalatyn ujymda jas jýrnalıster tájirıbeden ótkende shyńdalyp qana qoımaı, ózindik jazý mashyǵyn qalyptastyryp tanylýyna da múmkindik zor ekenin aıtty. «Jýrnalıstıka órisinde ózindik dástúri, sony soqpaǵy bar stıhııasy ózgeshe ujymnan jastardyń úıreneri mol. Jazý óneri boıyna daryǵan jas jýrnalısti telearnaǵa, jýrnalıstıkanyń qaı salasyna salsań da, kibirtiktemeıdi, al telearnadaǵy qyzmetkerdiń keıbiri gazetke maqala jazýda oıy shashyrap, shatqaıaqtap qalatyny belgili. Gazet ustahanasynyń ustyny qanshalyqty salmaqty ekenin osydan da ańǵarýǵa bolady», dedi Ǵ.Músirep.
Bas redaktordyń orynbasary Talǵat Batyrhan: «Jýrnalıstıka – qyzyq mamandyq. Únemi izdeniste júresiń, aınalańnan, ortańnan úırenesiń. Tek óziń qyzmet isteıtin redaksııadaǵy qyzmetkerlerdiń jazý mashyǵyn ǵana emes, ózge ujymdaǵy áriptesterińniń de taqyrypty qalaı tolǵap jazǵanyn, málimetti qalaı máıekti jetkizgenin oqyp ta biligińdi shyńdaısyń. Bir sharany jazýǵa birneshe jýrnalıst barady, solardyń árqaısy aqparatty, bolǵan is-sharany óz deńgeıine saı jazady. Biri estimeı qalǵan málimetti, derekti ekinshi jýrnalıst zerdesine túıip ap aqparatyna qosýy múmkin. Kóp oqý da kerek, biraq sol oqyǵanyńdy toqyp qana qoımaı qaǵazǵa túsire bilý de sóz óneri sanalady», dedi.
Jas jýrnalıster gazet redaksııasynda ótkizgen óndiristik tájirıbe barysynda kóp jaıtty kókeıge túıgenin aıtty.
