Qarataý geologııalyq polıgony Taraz qalasynan 60 shaqyrym jerde ornalasqan. Ǵalamshar betindegi bul núkteniń mıllıardtaǵan jyldyq geologııalyq tarıhy bar. Tabıǵı keńistiktegi oqý alańy stýdentterge jer týraly keńinen aqparat alýǵa, Qazaqstan geologııasynyń bastaýynda turǵan akademık Qanysh Sátbaev syndy ǵalymdar zertteýlerimen tanysyp, alǵashqy geologııalyq kartanyń jasalýy, ken oryndarynyń tarıhy, óndiristegi ádis-tásildermen tanysýǵa múmkindik berdi.
Polıgon stýdentter tájirıbesi úshin kezdeısoq tańdalǵan joq. Munda talaı dáýirler tarıhynan habar beretin geologııalyq qaldyqtar bar. Bul tyń zertteýlerge jol ashýmen qatar ken oryndary jaıynda keńinen maǵlumat berýge yqpal etti.
Qarataý qoınaýynda elimizdegi iri polımetall kenderi shoǵyrlanǵan. Qarataý jotasynyń ońtústik-batysy men soltústik-shyǵysynyń aýa raıynda da biraz aıyrmashylyq bar. Betkeıleriniń topyraǵy qońyr, qyzǵylt qońyr keledi. Taýaralyq ańǵarlar men shatqaldarynda betege, boz, kóde kezdesetin bolsa, ózen ańǵarlary toǵaıly keledi. Elimizdiń basqa jerinde kezdese bermeıtin kaýchýk retinde qoldanýǵa bolatyn taý saǵyzy osy Qarataý qoınaýynda mol kezdesedi. Eń bıgi – Bessaz taýy. Qarataýdyń shyǵysy men Kishi Qarataý protezoılyq taqtatas jáne qumtastardan, ońtústik batysy Qarataý karbonnyń áktas, qumtas, konglomerat, devonnyń janartaýtekti jynystarynan túzilgen.
«Jer qoınaýymyz ken oryndaryna óte baı ekeni álemge málim. Elimizde Mendeleev kestesindegi barlyq metall kezdesedi. Biraq soǵan qaramastan, kóptegen ken qorymyz sarqylýǵa jaqyn. Olardyń deni sonaý keńes kezinen beri barlanyp, qazynasy ıgilikke jumsalyp keledi. Sondyqtan qazirgi jaǵdaıda geologııa salasyna jańasha kózqaras, tyń izdenister qajet. Bul kómirsýtekter salasymen qatar sıfrly ındýstrııa jáne basqa da salalarǵa qatysty. Sırek kezdesetin metaldar salasynda jańa ken oryndaryn ashý arqyly ekonomıkany damytýǵa tyń serpilis týǵyza alamyz», dep atap ótti Q.Turysov atyndaǵy Geologııa jáne munaı-gaz isi ınstıtýtynyń dırektory Asqar Syzdyqov.
Stýdentterge qolaıly jaǵdaı týǵyza otyryp, jetekshi mamandar arnaıy ázirlengen baǵdarlama aıasynda elimizdiń geologııalyq múmkinshilikterin barynsha túsindirýge tyrysty. Baǵdarlama aıasynda ǵalymdar men praktık mamandar jalpy jáne qurylymdyq geologııa, krıstallografııa jáne mıneralogııa, petrografııa, paleontologııa, gıdrogeologııa jáne geofızıka boıynsha leksııalar oqyp, tájirıbemen ushtastyrýǵa tyrysty.
Qatysýshylar shatyrly qosyndarda túnep, kúndiz naǵyz geologterge tán josparlanǵan marshrýttar boıynsha joryqqa shyǵyp, mıneraldy tastar men paıdaly qazbalardy barlady. Keshkilik mezgilde stýdentter keńse jumystarymen aınalysyp, kartalar jasady jáne jınaǵan málimetterin qaǵazǵa túsirip, pikir almasty. Bolashaq geologter kásibı sheberlikpen qatar sporttyq saıystarǵa, shyǵarmashylyq baıqaýlarǵa qatysty. Stýdentterge arnalǵan geologııalyq kvest jas ǵalymdar men geologııa ǵylymynyń kórnekti ókilderimen pikirlesýge, tájirıbe almasýda tamasha múmkindik boldy.
Is-sharaǵa «Qazaqmys Barlaý», «ERG», «ERG Exploration», «KAZ Minerals» jáne «Onıks-R» sııaqty kompanııalar qoldaý kórsetip, ýnıversıadany joǵary deńgeıde uıymdastyrdy deýge negiz bar.
Sońǵy jyldarda geologııalyq baıqaýlar elimizdiń mektep oqýshylary arasynda «Jas geolog» respýblıkalyq olımpıadasy túrinde turaqty túrde ótkizilip keledi. Al stýdentter arasyndaǵy geologııa baıqaýy bıyl alǵash ret ótip otyr.
Ýnıversıada qorytyndysy boıynsha Semeı geologııalyq barlaý kolledjiniń komandasy 1-oryndy, Sátbaev ýnıversıtetiniń komandasy 2-oryndy ıelense, úzdik úshtikti Nazarbaev ýnıversıtetiniń stýdentteri enshiledi.
ALMATY
