ASTANA. 20 qańtar. Astanalyq «Barys» óz aıdynynda Ýfanyń «Salavat Iýlaev» komandasyn qabyldap, 3:2 esebimen jeńiske jetti. Bul týraly vesti.kz habarlady.
Birinshi kezeńde esep ashylǵan joq. Desek te, qos tarapta da shaıba soǵatyn tamasha múmkindikter boldy. Máselen, oıynnyń nebári úshinshi mınýtynda «Barys» sapynan Konstantın Pýshkarev tártip buzyp, eki mınýtqa aıdynnan qýyldy. Áıtse de, bul basymdyqty ýfalyqtar paıdalana almady. О́z kezeginde, aıdyn ıeleri de dál osyndaı úsh múmkindikke ıe bolǵanymen, tablodaǵy esep ózgerissiz qaldy. Kezeń sońynda «Salavat Iýlaev» taǵy da oıynshylar sany jóninen basymdyqqa ıe boldy. Bul joly «Barys» qaqpashysy Pavel Polýektov sheberligimen kózge túsip, óz ıeligin goldan aman saqtap qaldy.
Úzilisten keıin Andreı Nazarovtyń shákirtteri jınaqylyq tanytyp, shıraq qımyldaýǵa kóshti. Nátıjesinde, oıynnyń 34-mınýtynda Roman Starchenko esep ashyp, «Qazaqstan» sport keshenine jınalǵan jankúıerlerdi qýanyshqa bóledi. Ekinshi úziliske deıin Ýfadan kelgen komanda qansha tyrysqanymen, tarazy basyn teńestire almady.
Úshinshi kezeń taǵy da «Barystyń» basymdyǵymen bastaldy. Tóreshi ysqyryǵy estile salysymen shabýylǵa umtylǵan astanalyqtar Kevın Dallmenniń dál soqqysymen esepti eseledi. Bul oıynnyń 41-mınýty edi jáne «Barystyń» oıynshy basymdyǵyn paıdalanǵanyn aıta ketken jón. Al Dallmenge nátıjeli pas shyǵarǵan Brendon Bochenskıı boldy. Alaıda, der kezinde es jıǵan qonaqtar oıynnyń 51 jáne 57-mınýttarynda eki birdeı shaıba soǵyp, esepti teńestirip ketti. «Salavat Iýlaev» sapynan kózge túskender, sáıkesinshe, Evgenıı Skachkov pen Anton Slepyshev.
Oıynnyń bitýine nebári bir mınýt qalǵan kezde «Barys» sapynan Nıkolaı Antropov tamasha soqqysymen esepti 3:2-ge jetkizdi. Kók jolaqtyń boıynan shaıbaǵa ıelik etken ol úsh birdeı qorǵaýshyny qapy qaldyryp, qaqpany dál kózdegenin aıta keteıik.
Bul jeńisinen keıin «Barys» Qurlyqtyq hokkeı lıgasynyń Shyǵys konferensııasynda qaıtadan 6-orynǵa kóterildi. Osyǵan deıin eki oıyn qatarynan jeńilgen olar 7-orynǵa túsip qalǵan bolatyn. Elordalyq komanda kelesi oıynyn 22 qańtar kúni Novosıbırskiniń «Sıbır» komandasyna qarsy ótkizedi. Atalmysh tartys Astanada ótedi.
Elaman Qońyr.
Derek: vesti.kz.
Sýret: hcbarys.kz.
