Foto: Ashyq derekkóz
Qalalyq mobıldilik basqarmasy 80 teńgelik tarıf 2011 jyldan beri ózgermegenin, tek byltyr ǵana 20 teńgege kóterilgenin atap ótti. Qazir Almatyda qoǵamdyq kólik tarıfiniń quny banktik aýdarym arqyly tóleý kezinde 100 teńge, qolma-qol tóleý kezinde 200 teńge bolyp belgilengen.
Bul rette basqarma bıylǵy jyly qoǵamdyq kólikterde jol júrý aqysy ortasha eseppen 310 teńgeni qurasa, keıbir baǵyttar boıynsha 400 teńgege jetkenin basa aıtty. Osyǵan baılanysty tasymaldaýshylarǵa tólenetin sýbsıdııa kólemi jyl saıyn artyp keledi. 2023 jyly 68,7 mlrd teńge bólinse, 2024 jyly sýbsıdııalaýdyń boljamdy kólemi 97,3 mlrd teńgege deıin ósti.
«Qala tasymaldaýshylary qoldanystaǵy tarıf tasymaldaýshylardyń avtobýstardy satyp alýǵa, jańartýǵa jáne ýaqtyly qyzmet kórsetýge, sondaı-aq júrgizýshilerdiń jalaqysyn kóterýge jumsaǵan shyǵyndaryn ótemeıtinin alǵa tartty. Tasymaldaýshylarǵa jáne jergilikti bıýdjetke júktemeni ishinara azaıtý maqsatynda qalalyq qatynastarda jolaýshylar men bagajdy avtomobılmen turaqty tasymaldaýǵa tarıf belgileý týraly qala ákimdigi qaýlysynyń jobasy daıyndaldy. Joba jol júrý tarıfin 120 teńgege deıin kóterýdi kózdeıdi. Tıisinshe, azamattardyń jeńildetilgen sanattary úshin jol júrý quny tarıftiń 50 paıyzyn quraıdy», delingen basqarmanyń taratqan habarlamasynda.
Sonymen qatar qoǵamdyq kólikte jolaýshylardyń qaýipsizdigin qamtamasyz etý maqsatynda qolma-qol aqshamen tóleý aqysy alynyp tastalady.
