Ulttyq quramanyń bas bapkeri Myrzaǵalı Aıtjanov jattyǵý jıynyn boksshylar tolyq quramda ótkerip, barlyǵy da qatysqanyn jetkizdi.
– Oqý-jattyǵý joǵary deńgeıde ótti, jigitterdiń bári qatarda, syrqattan din aman. О́zderine júktelgen tapsyrmany tyńǵylyqty oryndap, bári da birte-birte babyna enip keledi. Biz olardy birneshe kúnge demalysqa jiberdik. Fransııaǵa attanar aldyndaǵy sońǵy jıyndy 9-20 shilde aralyǵynda Shymkentte ótkizemiz, – dedi bas bapker.
Shymkent qalasyndaǵy «Almataý» kesheninde ázirlikti túıindep, Parıjge attanatyn boksshylarǵa zor jaýapkershilik júktelip otyr. Jazǵy Olımpııa oıyndaryna 1996 jyldan beri qatysyp kele jatqan Qazaqstan quramasy 2021 jylǵa deıin altyn medalsiz qaıtqan emes. Boksshylar jyrtyǵymyzǵa jamaý, kóńilimizge medeý bolyp kele jatyr. 1996 jyly AQSh-tyń Atlanta qalasynda ótken jazǵy Olımpııa oıyndarynda Vasılıı Jırov 81 kg salmaqta chempıon atandy. 2000 jyly Aýstralııanyń Sıdneı qalasy tórin usynǵan tórt jyldyq dodasynda Bekzat Sattarhanov (57 kg) pen Ermahan Ibraıymov (71 kg) jeńis tuǵyrynan qol bulǵady.
2004 jyly Grekııanyń astanasy Afıny qalasynda alaýy tutanǵan Olımpııa oıyndarynda elimizdiń sportshylaryna buıyrǵan jalǵyz altyn medaldi da boksshy Baqtııar Artaev (69 kg) oljalady. 2008 jyly Beıjiń (Qytaı) tórinde ótken Olımpıada altynyn Baqyt Sársekbaev (69 kg) enshiledi. 2012 jyly Londonda (Anglııa) Serik Sápıev (69 kg) jeńiske jetti. 2016 jyly ótken Rıo jazǵy Olımpıadasynda Danııar Eleýsinov(69 kg) Olımpıada chempıony atandy. О́kinishke qaraı, 2021 jyly ótken Tokıo jazǵy Olımpııa oıyndarynda boksshylarymyzǵa 2 qola medal buıyrdy. Qamshybek Qońqabaev asa aýyr salmaqta, Sáken Bıbosynov 52 kg salmaq dárejesinde jartylaı fınalǵa jetti. Tokıoǵa toǵyz boksshymyz qatyssa, Parıjge 7 salmaqta da sportshylar barady.
