Investorlar memlekettik qoldaýdy, atap aıtsaq, ınvestısııalyq kelisimshart negizinde beriletin ınvestısııalyq preferensııalardy, sondaı-aq arnaıy ekonomıkalyq jáne ındýstrııalyq aımaqtar týraly zańnamaǵa sáıkes beriletin AEA jeńildikterin paıdalanyp keledi.
«Bir tereze» qaǵıdaty boıynsha ınvestısııa tartý jáne súıemeldeý boıynsha jumys júrgizetin «Astananyń damý ortalyǵy», sondaı-aq elordanyń arnaıy ekonomıkalyq aımaqtaryn basqaratyn «Astana Invest» front-ofısteri ınvestorlarmen turaqty baılanysta. Ekinshiden, ınvestısııalyq jobalardy iske asyrý nátıjesinde qala bıýdjeti salyq túsimderin alady. Turaqty jumys oryndary qurylatyny taǵy belgili. Bul bas qalanyń bolashaǵyn odan ári bekemdeýge úlken septigin tıgizetini anyq», deıdi Astana qalasy ákimdiginiń Investısııalar jáne kásipkerlikti damytý basqarmasy bóliminiń basshysy Nurjan Áshimov.
Sondaı-aq jergilikti kásipkerler salatyn ishki ınvestısııadan basqa, Astana ekonomıkasyna qarjy quıýǵa sheteldik kásipkerler de múddeli. Taǵy bir aıta ketetin jaıt, elordaǵa ınvestor tartýda kóbine-kóp ónerkásip, agroónerkásip kesheni, bilim, densaýlyq saqtaý jáne týrızm salalary basym baǵytqa ıe bolyp otyr.
Jańa joba – jańa jumys
Jaqynda Astanada óńirlik ınvestısııalyq shtabtyń otyrysy ótip, birqatar ınvestısııalyq joba talqylandy. Túrkııalyq «YDAholding», amerıkalyq «GE HealthCare» kompanııasy sııaqty sheteldik ınvestorlarmen qatar, otandyq «TOKK Kazakhstan» JShS, «Land Invest Group» JShS qatysqan jıynda júzege asyp jáne endi bastalǵaly jatqan jobalardyń mańyzdy máseleleri men ózektiligi sóz boldy.
Mysaly, «YDA» túrik kompanııasy óńdeý ónerkásibinde jalpy quny 32,6 mlrd teńgeni quraıtyn 2 jáne densaýlyq saqtaý salasynda somasy 165 mlrd teńgege jýyq 2 jobany júzege asyryp jatyr. «Astana-Tehnopolıs» AEA aýmaǵynda «GE HealthCare» amerıkalyq kompanııasynyń medısınalyq qural-jabdyqtar shyǵarý jónindegi ınvestısııalyq jobasyn júzege asyrý úshin jer ýchaskesi belgilenipti.
«TOKK Kazakhstan» JShS elordada jalpy ınvestısııa kólemi 55 mlrd teńgeni quraıtyn tamaq ónimderine arnalǵan qalaıy (alıýmınıı) bankalar men metall qaqpaqtardy shyǵarýdy kózdeıtin ekinshi iri ınvestısııalyq jobasyn bastap ketti. Zaýyttyń óndiristik qýaty – 1 mlrd dana ónim. Sonymen qatar otandyq ınvestorlar Astananyń úsh aýdanynda, ıaǵnı Almaty, Esil, Nura aýdandarynda 3 500 sharshy metrlik 3 mektep salýdy josparlap otyr.
Otyrysta bas qaladaǵy keıbir tozyǵy jetken nysandardy jańartý aıasynda «Lend Invest Grýpp» JShS-nyń apatty jaǵdaıdaǵy turǵyn úılerdi jóndeý oryndarynda kommersııalyq ınfraqurylym qurý týraly usynysy da qaraldy. Mundaǵy basty maqsat – qalaǵa jeke ınvestısııa tartý, soǵan oraı turǵyn úılerdi jańartý arqyly elordanyń syrtqy kelbetin jaqsartý bolyp otyr.
Taǵy bir iri ınvestısııalyq joba – №1 Indýstrııalyq park aýmaǵynda «Temirservıs Astana» JShS jáne «Sentralnyı IndýstrıalPark» JShS qatysýymen temirjol júkterin qamtıtyn logıstıkalyq hab salý.
Otandyq ónimge suranys kóp
Astana qalasy mańyndaǵy №1 Indýstrııalyq parkten 1 gektar jer alyp, zaýyt kótergen kásipker Maqsat Sádýaqasov basqaratyn óndiris orny «Metal Former» dep atalady. Seriktestik qurylys kórkin ashatyn shatyr men úıdiń syrtqy jáne ishki qabatyna ár beretin qaptaý materıaldaryn shyǵarady. Joba byltyr jeltoqsanda iske qosylyp, Memleket basshysynyń ózi kelip, sáttilik tilegen edi.
6 mlrd teńgege jýyq ınvestısııa salynǵan óndiris oshaǵynda 56 adam jumys isteıdi. Maqsattyń aıtýynsha, jańa zaýyt úshin ınvestısııa quıýǵa «Samruk-Kazyna Construction» 80 paıyz úles qossa, qalǵanyn kásipkerdiń ózi jobaǵa baǵyttaǵan. «CT KZ» sertıfıkaty (jergilikti ónim ekenin dáleldeıtin qujat) bar óndiris oshaǵy qazir elde «Jaıly mektep» jobasyna qatysyp jatyr. Negizinen ónimderge tapsyrys iri qurylys kompanııalarynan túsedi. Negizgi satyp alýshylary – «BI-Group», «Mabco», «Bazis-A» qurylys kompanııalary. Odan bólek, 56 túrli qurylys materıaly Astana, Almaty, Qostanaı, Shymkent, Túrkistan, Aqtaý jáne Atyraý qalalaryna jiberilip jatyr.
«Shatyr jáne qaptaý materıaldaryn shyǵaratyn «Metal Former» zaýytyn arnaıy ekonomıkalyq aımaqtyń (AES) basqarýshy kompanııasy – «Astana Invest» qalalyq ınvestısııalardy damytý ortalyǵy kómegimen iske asqan joba desek bolady. Jobany júzege asyrýda jańa zamanaýı jabdyqtar arqyly ónim sapasy men qýattylyǵyn arttyrý, aýqymyn keńeıtý, qosymsha jumysshylardy tartý jumystary júrgizildi. Ázirge ártúrli ónerkásiptik jáne azamattyq nysan salatyn mundaı iri kompanııalardyń otandyq ónimge degen suranysy jaqsy», deıdi «Astana Invest» basqarma tóraǵasy Ashat Bekeev.
Tóraǵanyń aıtýynsha, qazir elordada eki arnaıy ekonomıkalyq aımaq (AEA) jumys isteıdi. Biri – «Astana – jańa qala» dep atalsa, ekinshisi «Astana-Tehnopolıs» ekonomıkalyq aımaǵy. Osy AEA-nyń basqarýshy kompanııasy – «Astana Invest» qalalyq ınvestısııalardy damytý ortalyǵy. Byltyr osy eki aımaqta barlyq quny 8,59 mlrd teńgege 7 joba paıdalanýǵa berilgen. Olardyń qatarynda biz aıtqan zaýyttan bólek, plastıkalyq terezeler óndirisi («Astanaplaststroı»), ınnovasııalyq energııa únemdeıtin materıaldar («3i Materials»), polımerli qubyrlar men fıtıngter («ATZ Arystan»), termostalǵan kvars generatorlaryn óndirý (ArtXtal»), qurylys materıaldary («QTKSS») jáne jıilikti retteıtin elektr jetekteriniń óndirisi («Power Conversion Systems») boıynsha seriktester bar. Al bıyl quny 19,8 mlrd teńge bolatyn 10 jobany iske qosý josparlanǵan. Iske assa, 260-qa jýyq jumys orny ashylmaq.
