Bir jylda 400 myńǵa jýyq ónim túrin naryqqa shyǵaratyn kompanııanyń el kóleminde tutynýshysy qalyń. 180 adamdy turaqty jumyspen qamtyǵan zaýyt bıyl birinshi toqsanda 96,05 mlrd teńgeniń ónimin óndirgen.
«Kásiporyn bes óndiristik zaýyttan turady. Birinshisinde qurylysqa eń qajetti ónim – plastık jáne alıýmınııden esik-tereze jasalsa, ekinshi zaýytta medısınalyq jabdyqtar qurastyrylady. Úshinshide «Jaıly mektep» jobasyna saı keletin mektep jabdyqtary, medısına salasy men barlyq keńsege qajetti túrli jıhazdar daıyndaımyz. Tórtinshi bólikte tek aýrýhanaǵa qajetti túrli kereýet, al endi bir zaýytta modýldik metall konstrýksııa buıymdary shyǵady. Búginde taǵy bir zaýyttyń qurylysy bitýge taıaý. Onda mıneraldy maqta arqyly úı syrtyn qaptaýǵa kerekti sendvıch-panelder óndirilmek», deıdi seriktestiktiń atqarýshy dırektory Murat Chetın.
Aýrýhana qurylysy bastalǵan ýaqytta aldyn ala josparlanatyn operasııalyq gaz konsoldary da osynda daıyndalady.
Medbıkelerge qajetti súıretpe arbalar, shuǵyl ota jasaý bólmesine kerek arnaıy jabdyqtalǵan ústel men birneshe motorly kereýettiń kóptegen túri bar. Aýrýdy tasymaldaýǵa arnalǵan katalka-súıretpeler de – kompanııanyń negizgi ónimderiniń biri.
«Gınekologııalyq kreslodan bólek, perzenthana kereýeti men dúnıege jańa kelgen sábılerdi ornalastyrýǵa arnalǵan shaǵyn jabdyqtar da osynda. Basty shıkizat temir bólikteri óz elimizden tabylsa, medısınalyq jabdyqtardyń keıbir bólshegi men plastıkalyq zattar Túrkııadan keledi. Jıhazǵa qatysty shıkizatty ázirge Reseıden, sondaı keıbir «DSP», ıaǵnı aǵash qıqymdarynan syǵymdalǵan taqtaılardy respýblıkadaǵy óndirýshilerden de alamyz. Biraq kóbine-kóp olar óndirgen taqtaılar bizdiń qoıǵan talapqa saı kelmeı jatady. Jalpy, lamınattalǵan aǵash buıymdarynyń sapaly bolǵanyn qalaımyz. Sonymen qatar bizdiń tereze-esikterimizge «BI Group», «Orda Invest» sekildi iri qurylys kompanııalary tapsyrys beredi», deıdi kásiporyn dırektorynyń kómekshisi Anar Sársenbekova.
Kompanııa qurylys salýǵa da belsendi qatysady. Mektep, aýrýhana, sonymen qatar áýejaı qurylysyna atsalysyp, ishki qyzmet kórsetý, jabdyqtaý jumystaryn da qosa atqarady. О́zderi shyǵaratyn metall konstrýksııalyq buıymdar arqyly saıajaı, jol polısııasy men kúzetke arnalǵan, sondaı-aq medısınalyq shaǵyn beketter, jyly aıaldamalar jáne avtobandar boıyndaǵy dámhana, dárethanalardy qurastyrady. Bul tizimge qozǵalmaly-jınalmaly shaǵyn jyly baspana qurylysy da kiredi.
«Pandemııa kezinde bizdiń kompanııa 68 kún ishinde Albanııa elinde konstrýksııalyq metall jabdyqtaryn paıdalana otyryp, qalalyq aýrýhana turǵyzdy. Mundaı baǵyttaǵy qurylysty bizdiń elde de júrgizýge bolady, biraq klımattyq jaǵdaıdy da eskerý kerek», deıdi Anar Sársenbekova.
Taǵy bir jańalyq, kásiporyn Astana qalasy ákimdiginiń «JOLTAP» jobasymen birlese jumys isteıdi. Bul jerde óz múmkindigin synap, túrli mamandyqty ıgerem deýshiler atalǵan jobamen óndiriske kelip, arnaıy bekitilgen muǵalimniń baǵytymen qosalqy mamandyq alyp shyǵady. Atalǵan joba arqyly óndiriste bir aı kóleminde «Dánekerleýshi» mamandyǵy oqytylyp keledi. Mundaı kýrsty bitirgen keıbir úzdik mamandardy kásiporyn turaqty jumysqa qabyldaýǵa da yqylasty eken.
