Bıyl jyl basynda qurylǵan kásiporyn qurylysyna 9 mlrd teńge qarjy jumsalypty. 11 myń sharshy metr jerdi alyp jatqan óndiris alańynyń basty maqsaty – jol qurylysyna, sonyń ishinde jaıaý júrginshiler jolyna qajetti ónim túrlerin daıyndaý. Sonymen qatar kásiporyn óz ónimderin saqtaıtyn qoıma da turǵyzǵan.
«Asyl qala» brendtik tósemtas quıýmen aınalysady. Joba eki kezeńnen turady. Birinshi joba boıynsha óndiris orny «Damý» qory jáne «Halyk Bank» arqyly qarjylandyryldy. Qazir tapsyrysqa baılanysty aýysym sanyn kóbeıtý oıymyzda bar. Eger úsh aýysymmen jumys isteıtin bolsaq, onda taǵy 90 jumysshy qajet. Zaýytymyz erkin ekonomıkalyq aımaqta ornalasqan soń memleketten de kómek bolyp otyr, mysaly, salyq jaǵynan jeńildikpen qoldaý kórsetip keledi. Bul zaýyt jumysynyń ilgerileýine úlken septigin tıgizdi. Ekinshiden, jaqyn arada jobanyń kelesi kezeńi júzege aspaq. Iаǵnı ekinshi zaýytty iske qosamyz. Ol kezde 170 adam jumyspen qamtylady. Demek aldaǵy 1-2 jylda zaýyt qýattylyǵy eki ese artady», deıdi kásiporyn basshysy Jaqsylyq Esentemirov.
Kásiporynda isteıtin jumysshylarǵa barlyq jaǵdaı jasalǵan. Aýysym saıyn jýynatyn bólme, tazalyq máselesi, arnaıy kıim qaralǵan. Sondaı-aq qala ortalyǵynan kelýshilerge tasymal kóligi júrip tur.
20 tústi ári bir-birine uqsamaıtyn 25 pishinmen 500 túrli úlgide tósemtas quıatyn zaýyt ónimine suranys joǵary. Basshylyq óz múmkindigin keńeıtýdi oılastyryp otyr. Ári tutynýshy suranysyna oraı, qandaı tústi tósemtas qajet bolsa, ony da oryndaıdy. Jyl sońyna deıin taǵy birneshe túrli pishinde tósemtas shyǵaryp, naryqqa ótkizýdi josparlaǵan.
«О́nim kólemi – táýligine 5 myń sharshy metr. Zaýytta tósemtastan bólek, kóshe joldary men trotýar jıegine arnalǵan bordıýr de quıylady. Otandyq ónim bolǵan soń sapaǵa jiti kóńil bólemiz. Ár ónimniń jaramdylyq merzimi 4 jylǵa eseptelgen. Ras, ónim baǵasy tutynýshyǵa qymbat bolyp kórinýi múmkin. Biraq sapany alǵa qoıǵan bizdiń kásiporyn óz óniminiń uzaq merzimge shydaıtynyna kepildik beredi. Al arzan ári sapasyz ónim shyǵarsa, onda zaýyt jumysy birden quldyraıdy emes pe? О́ıtkeni elimizdegi qurylys salasynda qyrýar jumys júrip jatyr. Zaýytqa zamanaýı úlgidegi jabdyqtardy aldyrtqanbyz. Jumys tolyq avtomattandyrylǵan. Qazir kásiporynnyń 80%-y óndiristik qýatqa ıe. Biraq aldaǵy ýaqytta jumys qarqyny údeı túsedi», deıdi kásiporyn dırektory.
Aıtýynsha, barlyq ónim naryqqa shyqpas buryn arnaıy kásiporyn zerthanasynda bir aı boıy synaqtan ótedi. Oń qorytyndy berilgen soń ǵana óndiris sehyna jiberilip, quıyla bastaıdy. Sondaı-aq zaýytqa qajetti shıkizat kózi – óz elimizdiki. Iаǵnı qum men sement jáne basqa qospalar syrttan kelmeıdi. Bul da aqshanyń syrtqa ketpeı, ishki qarjy aınalymyna óz septigin tıgizeri aıdan anyq.
Tutynýshylar demekshi, brendtik tósemtas pen bordıýrge kóbine-kóp Astana qalasyndaǵy qurylys kompanııalary tapsyrys beredi. Sonymen qatar óńirlerden de alýshylar joq emes. Mysaly, Semeı qalasy zaýyt ónimin kópten satyp alyp keledi. Sondaı-aq týrıster kóp aǵylatyn Aqmola oblysyndaǵy Býrabaı aýdanyna da túrli tósemtas jiberilip jatyr. Ulytaý oblysynyń ortalyǵy – Jezqazǵandaǵy qurylysqa da osy kásiporyn ónimi jóneltilgen. Petropavlda salynyp jatqan tennıs ortalyǵyna da zaýyt ónimi paıdalanylǵan.
