Lakı Kesoglý «Barys» ordenimen marapattaldy

Almaty qalasynyń ákimi Erbolat Dosaev daryndy mýzyka maıtalmanyna aıtýly marapatty tabystap, el Prezıdentiniń atynan 85 jyldyq mereıtoıymen quttyqtady.

«Tabıǵı talant pen qajyrly eńbektiń arqasynda siz úlken shyǵarmashylyq joldan óttińiz, estradalyq sahnada kásibı deńgeıde tanylýǵa jáne tabysqa qol jetkizdińiz. Elimizde jáne shetelde kóptegen jankúıer sizdi joǵary oryndaý mádenıeti, mánerli lırıkalyq tenory, ártúrli janr men stıldegi ánderdiń mol repertýary úshin jaqsy kóredi jáne baǵalaıdy. Sizdiń ónerge qyzmet etýińiz, mádenı jáne rýhanı murany arttyrýǵa, daryndy jastardy tárbıeleýge qosqan zor úlesińiz úlken qurmetke laıyq», delingen Qasym-Jomart Toqaevtyń qut­tyqtaýynda.

Lakı (Panteleımon) Kesoglý 1939 jyly týǵan, Qurmanǵazy atyndaǵy Memlekettik konservatorııany «Opera, konserttik ánshi, oqytýshy» mamandyǵy boıynsha bitirgen.

Eńbek jolyn 1967 jyly konservatorııa janyndaǵy opera stýdııasynyń solısi qyzmetinen bastaǵan. 1970 jyly Máskeýde ótken Búkilodaqtyq estrada artısterdiń baıqaýynda dıplomant boldy. 1972 jyldan 1998 jylǵa deıin Qazaq televızııa­sy men radıosy estradalyq-sımfonııalyq orkestriniń jetekshi solısi bolyp jumys istedi. Osy kezeńde ol Máskeýdegi Odaqtar úıiniń Kolonna zalynda dırıjerler Iý.Sılantev, V.Lıýdvıkovs­kıı, B.Karamyshev, G.Garanıan, Iý.Mıhaılov, V.Mesherınniń jetekshiligimen Búkilodaqtyq radıonyń úzdik orkestrlerimen birge Kreml Sezder saraıynda, «Reseı» konsert zalynda jáne t.b. ortada óner kórsetti.

Lakı Kesoglý keńes jáne grek ánderi bar birneshe grammo­fon kúıtabaq, sondaı-aq «Kaprız­naıa pogoda» jazbasyn jarııalady, onda tanymal otandyq avtorlar Tiles Qajyǵalıev, Almas Serkebaev, Edýard Bogýshevskıılerdiń ánderin oryndady.

Sonymen qatar Lakı Kons­tan­tınovıch Qazaqstan mesenat­ta­ry­nyń «Tarlan» joǵary mý­zy­kalyq syı­lyǵynyń ıegeri, II dáre­je­li «Dostyq» (2004) jáne «Para­sat» (2019) ordenderimen mara­pat­talǵan.

ALMATY