Bul áýlettiń ómir órnegi temirjol salasymen astasyp jatyr. Úsh urpaqtan 26 adam qıyn da kúrdeli temirjolshy mamandyǵyn tańdaǵan. Olardyń barlyǵynyń temirjoldaǵy jalpy eńbek ótili 826 jyldy quraıdy. Tamyryn tereńge jaıǵan ónegeli áýlettiń ókilderi ónerden de qur alaqan emes. Saıysqa qatysýǵa ótinim bildirgen 235 otbasynyń ishinen oq boıy ozyp shyqqan Qapyshevtar endi qyrkúıek aıynda Astanada ótetin respýblıkalyq kezeńde baq synaıdy.
«Tókken ter, etken eńbek jemis beretinine kózimiz jetti. Bizdiń áýlettiń tarıhy shoıynjol boıyndaǵy qıyn da qyzyq salanyń tarıhymen qatar óriledi. Osy bir sharapaty mol mamandyq bizge ákelerimizden mıras boldy, bizdiń urpaǵymyz da urpaqtar sabaqtastyǵyn jalǵap, el úshin eńbek etip júr. Básekelestik úlken boldy. Endi Astanada óz qalamyzdyń jáne temirjolshylar áýletiniń namysyn qorǵaý úshin muqııat daıyndalamyz. Temirjolǵa degen súıispenshilik – bizdiń qanymyzda. Osynyń nátıjesinde biz jeńiske jettik. Biz óz mamandyǵymyzdy shyn júrekten jaqsy kóremiz», deıdi Murat Qapyshev.
Murattyń ákesi temirjolshy bolǵan, ol 1932 jyly osy salaǵa kelip, 1968 jyly zeınetke shyqqan. Jubaıymen birge olar segiz bala tárbıelep ósirdi. Olardyń barlyǵy ákesiniń jolyn qýyp, temirjol salasynda jumys istedi. Murat Qapyshevtyń kindiginen taraǵan úsh balasy da temirjolda jumys isteıdi.
«Mereıli otbasy» baıqaýynyń basty maqsaty – adamgershilik murattaryn jańǵyrtý, otbasy men nekeni qurmetteýge tárbıeleý, sondaı-aq otbasylyq qundylyqtar men qazaqstandyq otbasynyń oń ımıdjin kórsetý jáne keńinen nasıhattaý.
ALMATY
