Zaporoje selosyndaǵy «Stımýl» sharýa qojalyǵy shóp shabýǵa maýsym aıynyń ortasy aýa kirisken bolatyn. Qazir mal qoralary mańynda taılanyp, býylǵan 300 tonna shóp úıýli tur. 200 bas iri qara, 800 jylqy baǵyp otyrǵan sharýa qojalyǵyna qystan qysylmaı shyǵý úshin keminde myń tonna shóp qajet. Átteń, kún saıyn derlik jaýyn jaýyp, alǵa basqan qadamyn ilgeri attatpaı tur. Áıtse de shóp býyny qatqansha eńsere jumys isteýge talpynǵan shópshiler aýa raıynyń árbir ashyq sátin tıimdi paıdalanyp, atjalǵa túsirilgen shópti álsin-álsin qopara keptirip, jelge qaqtyryp, orama daıyndap jatyr. Eger aýa raıy múmkindik berse, ekijyldyq shóp qoryn jasap almaq.
– Baǵymdaǵy mal qystan kúıli shyǵýy úshin burynǵydaı jalǵyz shóp pen sabanǵa ıek artýǵa bolmaıdy, – deıdi sharýashylyq basshysy Sergeı Chepýrnoı. – Pishendeme de daıyndamaqpyz. Keıingi jyldary mal azyǵyn baıytýǵa baǵyt aldyq. Keıingi eki jyl boıy arpa men sulyny aralastyryp, untaqtap, mal azyǵyn daıyndaýǵa kóshtik. Ol úshin mal azyǵyn daıyndaıtyn shaǵyn zaýyt salyp aldyq.
Bul jumysty óndiris sheberi Anatolıı Kolesnık qadaǵalaıdy eken. Al shabyndyqta ýaqytpen sanaspaı jumys istep jatqan maıtalman mehanızatorlardyń biri – Oljas Áýbákirov. Ol «Belarýs» traktoryn júrgizedi. Tehnıka tizgindegenine on jyl bolypty. Mehanızatorlar kýrsyn aıaqtap kelgen soń ózge sharýashylyqta jumys istegen. Aýyl adamdary bir-birin jaqsy tanıdy emes pe, aldynan jumys úrkip otyratyn Oljastyń tyndyrymdy eńbegin kórgen sharýa qojalyǵynyń basshylary at-túıedeı qalap, ózderine shaqyrtyp alypty. Bir jaqsy jeri sharýa qojalyǵyndaǵy tehnıkanyń bári ónimdi jumys isteıtin sheteldik traktorlar. Aıtpaqshy, Oljas – áke jolyn qýǵan órenderdiń biri. Ákesi Esilbaı – burynǵy Qıma aýdanynyń Esil keńsharynda tabany kúrekteı qyryq jyl jumys istegen mehanızatorlardyń biri.
Oljastyń óz aıtýyna qaraǵanda, mektepte oqyp júrgeninde-aq traktor tizgindegen ákesiniń aldyna otyryp, jumys qaınap jatqan dalaǵa barǵandy jaqsy kórgen. Ákesi kóńili túskende saıyn dalada traktor tizginin de ustatatyn. Kekilinen sıpap otyryp kelisti keńesin beretin. Osylaısha, óziniń adal eńbegin jalǵastyratyn arly urpaǵyn tárbıeledi. «Uıada ne kórseń, ushqanda sony ilersiń» degendeı, Oljas ta saıyn dala tósinde aqyq dán ósirip, aqtyly mal baǵatyn dala erlerine uqsaǵysy keldi. Onyń ishinde asqar taý áke beınesi, onyń eseli eńbegi, parasatty beınesi ómirsheń ónege ispetti.
Onynshy jyl mehanızator bolyp kele jatsa da, bilmeıtin tustary bolyp qalady. Ondaıda kórshi aýylda turatyn ákesine telefon soǵyp habarlasady. Qazaqtyń jalpaq tilimen aıtqanda, «aqyl qaltasy» janynda.
Sóz arasynda Zaporoje selosy aýdandaǵy úlgili eldi mekenderdiń biri ekenin aıta ketsek, artyq bolmas. Aýylda qalyp, týǵan eldiń tútinin túzý ushyrýǵa bir azamaty retinde atsalysýdy paryzy sanaǵan Oljastyń kóńili qalaǵan jumysy, turaqty tabysy bar. Bir-birimen tonnyń ishki baýyndaı aralasyp, til tabysa alatyn ujymnyń ortasynda. Odan artyq eshteńe tilemeıdi de.
Aqmola oblysy,
Jaqsy aýdany
