Foto: gov.kz
Kóliktegi polısııa departamenti baspasóz qyzmetiniń habarlaýynsha, Phýket-Almaty baǵytyndaǵy reıs qonǵan boıda áýejaıda jelilik polısııa bóliminiń qyzmetkerleri esirtki tasymaldaǵan Almaty jáne Kókshetaý qalalarynyń 26 jastaǵy turǵyndaryn ustaǵan.
«Qazaqstannyń memlekettik shekarasyn kesip ótý kezinde qyzmettik ıt jolaýshylardan esirtki zattarynyń ıisin anyqtady. Tekserý barysynda olardan «gashısh», «keptirilgen marıhýana» jáne sıntetıkalyq esirtki tabylyp, tárkilendi. Ustalǵandar óz áreketteriniń zańsyzdyǵyn túsingen. Olar Taılandta demalyp júrgende esirtki zattaryn satyp alyp, jeke tutyný úshin sómkede saqtaǵan», dep habarlady Kóliktegi PD-niń baspasóz qyzmeti.
Almaty qalasy Túrksib aýdandyq soty Kókshetaý qalasynyń turǵynyn 1 jyl 9 aı merzimge bas bostandyǵynan aıyrý, al Almaty qalasynyń turǵynyna 200 AEK (738 400 teńge) kóleminde aıyppul salý týraly úkim shyǵardy.
