Foto: UOK
Tokıo - 2020 Olımpıadasynyń qola medal ıegeri birinshi kezdesýinde túrik Samet Gıýmıýshti aıqyn basymdyqpen jeńip, shırek fınalǵa shyqqan edi. Shırek fınalda otandasymyzdy ózbekstandyq Hasonbaı Dýsmatov kútip turdy. Bir-biriniń qyr-syryna qanyq eki boksshynyń jekpe-jeginde kórshi el boksshysynyń qoly kóterildi.
Parıj Olımpıadasyndaǵy jarys joly osylaı órbigen Sáken Bıbosynov el namysyn qorǵaǵany úshin baqytty ekenin jazdy.
«Arman…. Maqsat… Jeńis… Tokıo Olımpıadasynda qola medal alǵanymda, Parıj Olımpıadasynda qaıtsemde altyn alyp, maqsatyma jetemin dep oıladym, sol úshin osynda keldim. Osy Olımpıadany asyǵa kúttim. Elime altyn syılaǵym keldi. Kók týymyzdy kókte qalyqtaǵanyn, ánuranymyzdyń shyrqalǵanyn qaladym. Bári siz ben men oılaǵandaı bolmady. Sharshy alańǵa shyqqan sportshynyń baǵy men baby kelisip qatar shabýy kerek eken. Babymda boldym dep oılaımyn. Kishkene sáttilik jetispeı, baǵym janbaı qalǵan sııaqty. Degenmen, Allaǵa sansyz shúkir, taǵdyryma qazaqtyń namysyn qorǵaý baqyty jazylǵan eken.
Meni jeńiste de, jeńiliste de qoldaǵan jankúıerlerime alǵys aıtamyn. Jyly lebizderińiz úshin rahmet», dep jazdy Sáken Bıbosynov.
