Osy baǵytta qordyń biryńǵaı qaıyrymdylyq operatory «Samruk-Kazyna Trust» áleýmettik jobalardy damytý qorynyń qarjylaı qoldaýymen byltyr Túrkistan oblysynda «Aq Meıir» balalardy damytý jáne ınklıýzıvti bilim berý ortalyǵy jumysyn jańa qarqynmen bastap, túrli dıagnoz qoıylǵan erekshe bilim berý qajettiligi bar 150 balany keshendi kómekpen qamtydy.
Arnaıy mamandar logopedııalyq-defektologııalyq, pedagogıkalyq-psıhologııalyq kómek, sondaı-aq artterapııa, mýzterapııa, qum terapııasy, emdik jattyǵý boıynsha barynsha qamqorlyq kórsetken. Máselen, logoped-defektolog maman sóıleý tiliniń aqaýy bar, psıhıkalyq damýy tejelgen, áripterdi taza aıta almaıtyn, jalpy til kemistigi bar 50 balaǵa jyl on eki aı kómektesti. Nátıjesinde, atalǵan balalar aýrýynan aıyǵyp, tolyqqandy balalarmen birge sabaqqa baryp júr.
Pedagog-psıholog, pedagog-assıstent, mýzterapııa mamany erekshe bilim berý qajettiligi bar, úlgerimi tómen, sabaqty qabyldaýy, este saqtaý qabileti nashar balalarmen Pedagogıkalyq psıhologııalyq túzetý kabınetinde (PPTK) jeke jáne toptyq jumys istep, balaǵa arnaıy baǵdarlamamen sabaq ótip, kórkem jazýǵa, jyldam oqytýǵa, esep shyǵarýǵa, án aıtýǵa túrli ulttyq aspaptardy oınaýǵa degen daǵdylaryn oıatty. Al artterapııa, qum terapııasy mamany qummen oınaý, týsh, gýash, túrli-tústi qalammen sýret salý arqyly dıagnozy aýyr 2-3-toptaǵy múgedektigi bar, úıde oqytylatyn balalarmen jumys istedi.
Logoped kómegin alǵan oqýshylardyń biri – Erqanat Maqsat. Alǵash ret logopedtiń konsýltasııasyn alǵanda balanyń «r» dybysyn aıta almaıtyny, áripter men dybystardy shatastyryp naqty ornyna qoıa almaıtyny belgili bolǵan. Kúndelikti jumystyń nátıjesinde Erqanat ekinshi aıdan bastap oń nátıje kórsete bastady. Ýaqyt óte oqýshy «r» árpin aıtý, sondaı-aq dybystar men áripterdi shatastyrmaýdy úırendi. Sol arqyly mekteptegi dıktant jazýda baǵasy jaqsaryp, úlgerimi kóterildi.
Al damýynda aqaý bar Nýrıkamal Orazalynyń zeıinin jaqsartyp, qoǵammen baılanysyn durystaý qajet boldy. Oqýshynyń psıhologııalyq jáne fızıologııalyq erekshelikterin eskere otyryp, jeke metodıka quryldy. Sol arqyly balaǵa yńǵaıly ýaqytta qosymsha sabaqtar ótti. Jarty jyldan keıin Nýrıkamaldyń qatarlastarymen qarym-qatynasynda belsendiligi baıqaldy. Sýret salýǵa qyzyǵýshylyǵy ashyldy. Qazir osy óner arqyly óz oıyn jetkizýge baryn salyp júr.
«Oqýshylardyń qol motorıkasynyń damýyna, kórkem estetıkalyq, sezimtaldyq, talǵam, baıqampazdyq, meıirimdilik, ádeptilik qasıetterin tárbıeleýde, qııalyn damytýda, túsiný daǵdylaryn qalyptastyrýda úlken jumys atqaryldy. Jeńil jáne aýyr dıagnozy bar balalarmen arnaıy baǵdarlama boıynsha jumys júrgizdik. Nátıjesinde, oqýshylardyń ónerge degen qyzyǵýshylyǵy oıandy, óner arqyly ulttyq qundylyqtardy qurmetteýdi úırendi. Erekshe balalardy emdep-túzeýge, qoǵamǵa beıimdelýine jaǵdaı jasap, qarjylaı kómek kórsetip otyrǵan «Samruk-Kazyna Trust» qaıyrymdylyq qoryna alǵysymyz sheksiz», deıdi ortalyq jetekshisi Nurbolat Qaırambaev.
«Samruk-Kazyna Trust» KQ baspasóz ortalyǵy
