Foto: gov.kz
27 eldi meken qatarynda Tekeli qalasy, Kóksý, Eskeldi, Qaratal aýdandaryndaǵy birqatar aýyldar jáne Taldyqorǵan qalasy mańyndaǵy turǵyn aýdandar bar.
Oblystyq energetıka jáne turǵyn úı-kommýnaldyq sharýashylyǵy basqarmasynyń málimetine sáıkes, Eskeldi aýdanynyń eldi mekenderi men Tekeli qalasyn gazdandyrý úshin 2018 jyly uzyndyǵy 31,3 km «Taldyqorǵan-Tekeli» joǵary qysymdy gaz qubyry salyndy, al 2022 jyly respýblıkalyq bıýdjet qarajatyna Tekeli qalasynda jalpy uzyndyǵy 195 km ishki gaz taratý jelilerin salý jumystary bastalǵan. Búgingi tańda sonyń 147,5 km nemese 76% tartyldy. Sol sııaqty qoldanystaǵy 190 kóp qabatty úıdiń 176-sy gaz jelisine baılanystyryldy. Tıisti jumystar qazan aıynda aıaqtalady dep kútilýde. Sonda Tekeli qalasynyń 30 myńnan astam turǵyny kógildir otynǵa qol jetkize alady.
Eskeldi aýdanynda 21 eldi mekenniń 8-i gazǵa qol jetkizdi, olar - Aldabergenov, Qarabulaq, О́rqýsaq, Ekpindi, Mataı Baıysov, Eltaı, Syrymbet, Baqtybaı aýyldary. Sońǵy atalǵan eki aýyldyń jekelegen shaǵyn aýdandarynda gazdandyrý jumysy jalǵasyp jatyr. Qazirgi kezde Qaratal, Kókjazyq, Terekti, Eshkiólmes, Abaı, Shymyr, Jetisý, Jańalyq, Jastar jáne О́tenaı aýyldarynda gaz taratý jelilerin salý jumystary bastalǵan. Sonymen qatar Aqtasty aýylyndaǵy qurylys-montaj jumystaryna konkýrs aıaqtaldy. Eskeldi aýdanyn tolyq gazdandyrý úshin qalǵan eki eldi meken boıynsha jobalyq jumystar qolǵa alynǵan. Qurylys-montaj jumystary 2025 jyly aıaqtalady dep josparlanǵan. Osy jobalardy iske asyrý nátıjesinde atalǵan aýdan tolyǵymen gazdandyrylatyn bolady.
«Jetisý oblysynyń eldi mekenderin gazdandyrý máselesi – strategııalyq mańyzdy mindettiń biri. О́ńirde bul baǵyttaǵy jumystar qarqyndy júrip jatyr. Máselen, jyl sońyna deıin Eskeldi aýdanynda 9 aýyldyń – Terekti, Qaratal, Abaı, Eshkiólmes, Jetisý, Jastar, Jańalyq, О́tenaı, Shymyr aýyldary jáne Tekeli qalasy turǵyndarynyń úılerine gaz tartýǵa múmkindik jasalady. Qazan aıynyń sońyna deıin tekelilikter kógildir otynǵa qosyla alady, al atalǵan 9 aýyldyń turǵyndary gazǵa tamyz aıynyń sońynan bastap jyl aıaǵyna deıin kezeń-kezeńimen qosylady», dedi oblystyq energetıka jáne turǵyn úı-kommýnaldyq sharýashylyǵy basqarmasynyń gazdandyrý bóliminiń basshysy Azamat Kemelov.
Búginde Jetisý oblysynda gazdandyrý deńgeıi 47,6 paıyzǵa jetken, al jyl sońyna deıin bul kórsetkish 50%-dan asady dep boljanyp otyr.
Eske salsaq, 2025 jyldyń sońyna deıin óńirdiń 506,6 myń turǵyny bar 126 eldi mekenin gazdandyrý josparlanǵan, al gazdandyrýdyń ekinshi kezeńinde Aqsý, Alakól jáne Sarqan aýdandarynyń eldi mekenderi kógildir otynmen qamtylady. Qazirgi kezde «Taldyqorǵan-Úsharal» magıstraldy gaz qubyry qurylysynyń jobalaý-smetalyq qujattamasy ázirlendi. Mańyzy zor aýqymdy joba osy jyldyń tamyz aıynyń sońynda iske asyryla bastaıdy dep josparlanǵan. Ony aıaqtaýdyń aldyn ala belgilengen merzimi - 2026 jyldyń sońy. Osy jobalar júzege asyrylǵanda Jetisý oblysynda gazdandyrý deńgeıi 100%-ǵa jetkiziletin bolady.
