Jaqynda qazaq kúresinen ótetin jarysta Qazaqstannyń ulttyq komandasy qandaı quramda óner kórsetetini belgili boldy. Erler arasynda Bekjan Tólepov (55 kg, Jetisý oblysy), Meıirjan Bereketov (60 kg, SQO), Dıdar Tuqyshev (66 kg, Abaı oblysy), Jumajan Qojambekov (74 kg, Shymkent qalasy), Ersin Seıitqazynov (82 kg, Abaı oblysy), Erasyl Janataev (90 kg, Almaty qalasy), Ersultan Muzapparov (100 kg, Shymkent qalasy) jáne Nurdáýlet Jarylǵapov (+100 kg, Mańǵystaý oblysy) sııaqty sańlaqtar saıysqa túsedi. Osy jigitterdiń barlyǵy – túrli týrnırlerge qatysyp, jeńis tuǵyryna kóterilgender. Solardyń arasynan Ersultan Muzapparov pen Nurdáýlet Jarylǵapovty bóle-jara atap ótýge bolady. Olar – respýblıkalyq jáne halyqaralyq jarystarda daralanǵan ákki sportshylar. Ersultan men Nurdáýlet elimizdiń betkeustar balýandary retinde «Qazaqstan barysy» dep atalatyn mártebeli týrnırde kúsh synasyp, ár jyldary ózderiniń aıshyqty ónerimen san myń kórermendi qýantty. «Qara býra» atanǵan N. Jarylǵapov 2021 jyly atalǵan jarystyń qola júldegeri atanyp, álem chempıonatynda top jardy. Dzıýdo men qazaq kúresin qatar alyp júrgen E.Muzapparov kúsh atasy Qajymuqan Muńaıtpasovtyń memorıalynda bas júldeni oljalady. Olardyń basqa da tolyp jatqan ataqtary bar.
Áıelder básekesinde Aıjan Jylqybaeva (48 kg, Túrkistan oblysy), Nazerke Azamatova (52 kg, Aqtóbe oblysy), Raýza Nurmahametova (56 kg, Jambyl oblysy), Baqyt Qusaqbaeva (60 kg, Aqtóbe oblysy), Zarına Sarıpova (65 kg, Abaı oblysy), Roza Nysantaıqyzy (70 kg, Abaı oblysy), Zámzágúl Faızollanova (77 kg, Shymkent qalasy) jáne Álbına Bahıeva (+77 kg, Shymkent qalasy) baq synaıdy. О́zderińiz baıqaǵandaı, bul burymdylarymyzdyń deni – dzıýdo men sambonyń qas sheberi. Aralarynda aralas jekpe-jekten dúbirli dodalarǵa qatysyp júrgen Zámzágúl esimdi qazaqtyń qaısar qyzy da bar. Qazirgi kezde osy arýlarymyzdyń barlyǵy da qazaq kúresine myqtap den qoıǵan syńaıly.
Qazaq eliniń balýandary V Dúnıejúzilik kóshpeliler oıyndaryna tyńǵylyqty daıarlanyp jatyr. Jyl basynan beri eki ret Almatyda, odan bólek Grýzııa men Qyrǵyzstanda oqý-jattyǵý jıyndary uıymdastyryldy. Kúni keshe ǵana olar Aqmola oblysynyń Shýche qalasynda daıyndyq jumystaryn pysyqtap qaıtty. Osy jıyn barysynda irikteý saıystary ótip, atalǵan jarysta el namysyn qorǵaıtyn balýandar anyqtaldy. Al sońǵy oqý-jattyǵý jıynyn 27 tamyz ben 7 qyrkúıek aralyǵynda Astanadaǵy Jaqsylyq Úshkempirov atyndaǵy jekpe-jek saraıynda uıymdastyrý kózdelip otyr.
Qazaq kúresinen Qazaqstan ulttyq quramasynyń bas bapkeri Ǵanı Keldiqulov: «Bizdiń sportshylar Dúnıejúzilik kóshpeliler oıyndarynda fızıkalyq turǵydan da, tájirıbe jaǵynan da tolyqtaı daıyn. Buǵan deıin olar orta taý bókterinde jalpy dene daıyndyqtaryn qalpyna keltirip, sheteldik balýandarmen tájirıbe almasty. Al sońǵy oqý-jattyǵý jıynynda salmaq qýý jáne qalypqa kelý jumystaryna basymdyq beriledi. Osyndaı iri jarys jerlesterimizge úlken jaýapkershilik júktep otyr. Sol sebepti de senim artqan sportshylar aldaǵy mańyzdy jarysta el namysyn abyroımen qorǵap, jeńis tuǵyryna kóterilý úshin baryn salatynyna senimdimin», dep óz oıymen bólisti.
Esterińizge sala keteıik, Dúnıejúzilik kóshpeliler oıyndaryna 89 memleketten kelgen 2 myńnan asa sportshy qatysady. Astanadaǵy jarystyń baǵdarlamasyna 21 sport túri kirse, sonyń 12-si – tól ónerimiz.
