Kolledjderge 145 myń grant bólindi

Jańa oqý jylynda eli­mizdiń kol­ledj­­derinde mem­­lekettik bilim tap­sy­ry­sy­nyń kólemi 145 myń orynǵa deıin artty. Bul ótken jylmen salystyrǵanda 12 myń orynǵa kóp. Osylaısha, stýdentterdi suranysqa ıe mamandyqtar boıynsha tegin tehnıkalyq jáne kásiptik bilimmen qamtý 90%-dy qurady.

Mınıstrliktiń málim­deýin­she, Memleket basshy­sy­nyń tapsyrmasymen mem­lekettik tapsyrystyń 65%-y mashına jasaý, kólik, energetıka, IT, qurylys jáne ınjenerııa sekildi tehnıkalyq mamandyqtarǵa baǵyttalǵan. 2025 jylǵa qaraı bul kórsetkish 70%-ǵa, al memlekettik tapsyrys kólemi 100%-ǵa de­ıin ósedi. Sonymen qatar kolledjderge talapkerlerdi kásiporyndardyń ótinimderi negizinde jumysqa ornalastyrý mindettemesimen qabyldaý jalǵasyp jatyr. Osy atalǵan júıemen jyl saıyn 10 myń talapker qabyldanady. Mun­daı baǵyt kadrlardy eńbek na­ryǵynyń talabyna sáıkes daıarlaýǵa múmkindik beredi.

Oqý-aǵartý mınıstrliginiń habar­laýyna qaraǵanda, tehnı­kalyq jáne kásiptik bilim salasynda maman daıarlaýdyń mańyzdy bóligi – bıznes­pen yntymaqtastyq qurý. Qazir­gi ýaqytta 518 kásiporyn 410 kolledjdiń túlek­terin prak­tı­kalyq daıar­laýǵa, jumysqa orna­lastyrýdy qamtamasyz ete otyryp, dýaldi oqytýǵa jáne qamqorlyq kórsetýge qaty­syp otyr. Qabyldanǵan sol sharalardyń barlyǵy jas mamandardy kásibı daıarlaýǵa jáne elimizdiń kadrlyq áleýetin arttyrýǵa baǵyttalǵan.