Túrkistandyq arheologtar tarıhı nysandy tapty. Bul tas ǵıbadathana birneshe bólme men dálizden turady. Kóne jádiger Kangıýı dáýirine jatady deıdi mamandar. Sol kezeńdegi adamdar munda qurbandyq shalǵan kórinedi. Ǵıbadathanadan keramıkalyq tostaǵandar, temeki tartqyshtar, dıirmen tastary men astyq úkkishter tabylǵan. Shoshaqtóbe ǵıbadathanasy-ǵalymdar úshin úlken qazyna bolyp otyr.
Professor Aleksandr Podýshkınniń aıtýynsha, ǵıbadathana Kangıýı memleketiniń senimderi men rásimderi týraly túsinik beredi. Mundaǵy keıbir jádigerlerde kesirtkelerdiń, qoshqarlardyń, tipti azııalyq múıiztumsyqqa uqsas janýarlardyń keskini beınelengen. Sondaı aq, ǵıbadathana mańaıynan myńdaǵan qysh ydys tabylǵan.
«Biz munda ejelgi jádigerlerdi zerttep jatyrmyz. Ázirge munda qandaı rásimder oryndalǵany túsiniksiz, degenmen eginshilik atrıbýttary joıylǵan kezde bárin anyqtaımyz. Munda kóptegen qundy zattar bar. Meniń oıymsha munyń barlyǵy ejelgi dástúrmen baılanysty», dedi О́.Jánibekov atyndaǵy Ońtústik Qazaqstan pedagogıkalyq ýnıversıtetiniń professory Aleksandr Podýshkın.
Ǵıbadathananyń janynan birneshe qorym da tabylǵan. Munda otbasy músheleri men olarǵa tıesili bolǵan áshekeıler, jáne as úı ydystary jerlengen. Bul — adamdar ǵasyrlar boıy ómir súrip, qudaılaryna duǵa etken birtutas keshen bolǵan deıdi arheologtar.
«Bul jerleý oryndary sol zamannyń ózinde kóp tonalǵan. Bir emes birneshe ret tonalǵan. Tonalǵan kezde súıekterdi jan-jaqa shashylady. Degenmen keı buıymdar qalyp qoıady. Kórip turǵandaryńyzdaı bul — alıbastr. Sol kezdegi adamdarda qoldanǵan zattardy o dúnıege barǵanda qoldanady degen senim bolǵan. Jáne birge qoıyp jerleıtin bolǵan», - deıdi arheolog Gúlmıra Stamqulova.
Arheologtardyń aıtýynsha, bul aýmaqtaǵy zertteý jumystary birneshe jylǵa sozylady. Al Kangıýı memleketi kezeńiniń artefaktileri, ásirese ǵıbadathana kesheni men jerleý oryndary sııaqty nysandar – qazaqstandyq ǵylym úshin úlken jetistik. Tabylǵan barlyq jádiger Respýblıkalyq ortalyq memlekettik murajaıyna beriledi.
