Munaı baǵasynyń quldyraýy Irakka apat ákelip jatyr

ASTANA. 23 qańtar. Irak arab respýblıkasynyń premer-mınıstri Haıder al-Abadı munaıdyń álemdik baǵasy túsýinen keıin óz eliniń ekonomıkasy «apatty» jaǵdaıda qalyp qoıǵanyn aıtty. Bul týraly RIA «Novostı» habarlady. Ol sondaı-aq munaı baǵasyna baılanysty qalyptastyp otyrǵan ahýaldyń «Islam memleketi» ekstremıstik tobyryna qarsy kúreske keri áser etýi múmkin ekenin eske aldy. «Munaıdyń baǵasy ótken jyldyń osy merzimine qaraǵanda, shamamen 40 paıyzǵa túsip ketti. Irak ekonomıkasy men bıýdjetiniń 85 paıyzyn munaı quraıdy. Sondyqtan mynadaı jaǵdaı biz úshin naǵyz apatty ákelip otyr», - dedi al-Abadı Londonda ótken «Islam memleketimen» kúres koalısııasy músheleriniń kezdesýinen keıin. «Biz salyq jáne bıýdjet problemalarynyń qarýly kúshterge áser etpeýin qalaımyz», - degendi qosty ol. О́tken jylǵy jazdan bastap munaıdyń baǵasy 50 paıyzdan da ary tómen túsip ketti. OPEK elderiniń 27 qarashadaǵy táýligine 30 mln. barrel munaı óndirý deńgeıin ustap turý týraly sheshimi baǵanyń betimen ketýine aparyp soqtyrdy. Alaıda, munaı baǵasynyń barreline 50 dollardan da túsip ketkenine qaramastan, OPEK-tiń kóptegen elderi munaı óndirý kólemin qysqartýdan bas tartyp keledi. Murat Aıtqoja. Derek, sýret: RIA «Novostı».