QOSTANAI. 23 qańtar. L.Tolstoı atyndaǵy Qostanaı oblystyq ámbebap kitaphanada Qazaq handyǵynyń 550 jyldyǵyna arnalǵan «Ǵasyrlarǵa kýá bolǵan memleket» atty kitap kórmesinyń ashylý saltanaty ótti. Bul týraly egemen.kz tilshisi habarlady.
Bıyl elimiz Prezıdent Nursultan Nazarbaevtyń qoldaýymen Qazaq handyǵynyń 550 jyldyǵyn merekeleıdi. Oblystyq ámbebap kitaphana ujymy uıymdastyrǵan «Ǵasyrlarǵa kýá bolǵan memleket» atty kitap kórmesi osy aıtýly merekege arnaldy. Odan oqyrmandar Qazaq eli tarıhynan mol maǵlumat ala alady. Kitaphana qorynan alynǵan ekspozısııany tamashalaýǵa oblys óńirindegi belgili tarıhshylar, stýdentter qaýymy men aýdandyq, qalalyq kitaphanalar dırektorlary, BAQ ókilderi shaqyryldy.
Kórmege jalpy sany 200-den asa kitap qoıyldy. Olar Qazaq handyǵynyń qurylýy men táýelsiz Qazaqstannyń búginge deıingi tarıhynan syr shertedi. Kórmeniń ashylýyna qatysqandar ınternet arqyly Elbasy Nursultan Nazarbaevtyń respýblıkalyq jetekshi telearnalar jýrnalısterine bergen suhbatyn tyńdap, «Tarıh tolqynynda» kitabynyń jelisimen túsirilgen 3D formatyndaǵy «Qazaq eli» anımasııalyq jobasyn tamashalady. Qostanaı memlekettik pedagogıkalyq ınstıtýtynyń «Qazaqstan tarıhy» kafedrasynyń aǵa oqytýshylary, tarıh magıstrleri Raýan Baıdaly men Qýanysh Ábilmálikov qazaq handyǵynyń 550 jyldyq mereıtoıyn merekeleýdiń mán-mańyzyn tilge tıek etti. Qazaq memleketiniń ǵasyrlarǵa sozylǵan uzaq tarıhyn búgingi jas urpaq bilýi tıis. Memleketti qurǵan, onyń quqyqtyq irgesin qalaǵan jáne uly dalamyzdy qorǵaǵan handarymyz ben danalarymyz, batyrlarymyz búgingi táýelsiz Qazaqstannyń rýhanı dińgegi bola bermek. Jas urpaqtyń patrıottyq tárbıesiniń de qaınary – ulttyq tarıhymyz. О́tkendi baǵalamaı – jarqyn bolashaq joq. Kórmeniń saltanatty ashylýyna qatysqandar osyndaı ortaq túıin jasap, oblystyq kitaphana ujymyna rahmet aıtty.
Názıra Járimbetova.
Derek, sýret: egemen.kz.
