Jaqynda elimizde AES salý boıynsha referendým uıymdastyrylady. Búgingi jarııa talqylaýda halyqty alańdatqan suraqtar talqylandy.
«Búgingi qoǵamdyq keńeste AES týraly túrli pikirler aıtyldy. Fýkýsımadaǵy jáne Chernobylda bolǵan apatty da tilge tıek etti. Biraq tótenshe jaǵdaı bolǵanmen Japonııa men Reseı AES salýdan bas tartqan joq. Qazirgi tańda eki elde de AES keminde 30 paıyz energetıkalyq turaqtylyqty saqtap otyr. Al Fransııany 70 paıyz energetıkalyq turaqtylyqpen AES qamtamasyz etip otyr», dedi Elnur Beısenbaev.
Depýtat qazir elde energııa tapshylyǵy bar ekenine toqtalyp, bul 10 jyldan keıin aýyr zardaptarǵa ákelýi múmkin ekenin eskertti. Sondyqtan qoǵamdyq talqylaý barysynda bul taqyrypty ǵylymı turǵydan qarastyrý mańyzdy.
«Álemde barlyq memleket kómirden alynatyn energııadan bas tartyp jatyr. Máselen, kórshiles Qytaı memleketin alaıyq. Osydan 12 jyl buryn Beıjiń qalasynda boldym. Ol kezde qala kóshelerinde taza aýa bolmaıtyn biraq qazir ol álemdegi taza ekologııalyq qalalardyń qataryna kirip otyr. Sondyqtan da bizdiń elde mindetti túrde turaqty energııany qamtamasyz etý kerek. Búgingi talqylaýda túrli oqys jaǵdaılar bolýy múmkin degen pikirler aıtylyp jatyr. Bul aıtylyp jatqan pikirlerdiń ǵylymı jaǵyna nazar aýdarý qajet. Osy kúnge deıin elimizde úsh referendým ótti. Olardyń barlyǵy saıası baǵytta boldy. Qazaqstan birinshi ret áleýmettik, qoǵamdy mazalaıtyn referendýmdy ótkizeıin dep jatyr. Iаǵnı, bul Memleket basshysy aıtqan «qulaq asatyn memleket» qaǵıdasynyń iske asyp jatqanyn kórsetedi. Búgin shynaıy pikirtalas ótip jatyr. Iá ras, osynda AES-ti qoldaýshylardyń qatary kóbirek. Pikir aıtýshy ǵylymı sarapshylarda bar. «Amanat» partııasy osy ıdeıanyń meılinshe shynaıy iske asýyna jáne daýys berýde ádilettilikti saqtaýǵa kúsh salady. Bizdiń qatarymyzda da kásibı energetıka mamandary bar. Sondyqtan da bul taqyrypqa jan-jaqty qaraý qajet», dedi depýtat.
