Eski kúndi eske alar bolsaq, dinı nemese basqa nanym-senimge negizdelgen zorlyq-zombylyqqa ushyrap, qurban bolǵan adamdardy sanap taýysa almaısyz. Ejelgi Rımdegi hrıstıandardy qýǵyndaý, keıin kresshilerdiń musylmandardy qyryp-joıýy, derbes pikiri úshin ǵalymdardy óltirý, katolıkter men protestanttar arasyndaǵy qaqtyǵys jáne taǵy basqalary.
Asylynda barlyq din ártúrli terezeden túsip turǵan bir kúnniń sáýlesi ispetti. Ol ısi adamzatty jaqsy kórýge úndeýi kerek. Kez kelgen jandy násiline, senimine, azamattyq ustanymyna qaramaı, baýyr bolýdy ýaǵyzdasa kerek-ti. Meniki senen kúshti dep din jarystyrýdyń arty janjal, sońy soǵyspen bitedi. Qudaıdy qorǵaýdyń qajeti joq. Ol ózin onsyz da qorǵap alady.
Din – adamnyń jeke máselesi. Ony kópshilik ustanǵany jaqsy. Alaıda din jamaǵattyq sanaǵa ornyqqan kezde keýdemsoqtyq pen keri ıterýshilikten abaı bolǵan jón. «Sokratqa ý ishkizgen, Ioanna Arkti otqa órtegen, Ǵaısany darǵa asqan, paıǵambarymyzdy túıeniń jemtigine kómgen kim? Ol – kóp, endeshe kópte aqyl joq» dep Abaı dinı býkvalızmge shaldyqqan tobyrlyq túsinikti mansuqtaıdy. Shákárim bolsa barlyq aqyl eleginen ótkizý kerektigin aıtady. Áıtpese onyń túbi – qurdym dep eskertedi:
«Taza aqylmen tappaǵan din,
Shyn din emes – jyndylyq.
Qarmalaǵan bir soqyrsyń,
О́lgen oı men kóz, qulaq».
BUU Bas Assambleıasy bul ataýly kúndi bekitý arqyly barlyq memlekettik jáne úkimettik emes uıymdy, barlyq dinı konfessııa ókilderin din jáne nanym-senim negizindegi zorlyq-zombylyq qurbandary men zardap shekkenderdi eske alýǵa shaqyrady.
