Atap aıtsaq, 20 tamyzda Dýshanbe qalasynyń «Vatan» kınoteatrynda qazaq kıno kúnderiniń ashylýy rejısser R.Ábdirashevtyń qazaq handarynyń erligi men eldigin baıandaıtyn «Almas qylysh» tarıhı týyndysymen bastaý aldy.
Al kelesi kúni T.Sobırov atyndaǵy kınoteatr sahnasynda R.Súleımenovtiń keńes kezindegi syndarly saıasat pen aýmaly-tókpeli 1992 jylǵy oqıǵany sýretteıtin «Nabat operasııasy» usynyldy. Sondaı-aq 70-80 jyldardaǵy halyqtyń súıikti vokaldyq-aspaptyq ansamblderdiń biri týraly syr shertetin A.Sahamannyń «Dos-Muqasan» fılmi de kórsetildi.
Aıta keteıik, mádenıet kúnderiniń aıasynda Tájikstan astanasynyń qaq ortasynda, Fırdaýsı saıabaǵynda Abaıdyń bıýsti ashyldy. Qazaq oıshylynyń músini – eki eldiń tamyry tereń tarıhı-mádenı baılanysynyń nyshany ekeni sózsiz.
Qazaqstannyń Tájikstandaǵy mádenıet kúnderi «Kohı Borbad» memlekettik kesheni sahnasynda ótken qazaq-tájik ónerpazdarynyń gala-konsertimen qorytyndylandy. Bul keshte Halyq ártisteri Aıgúl Úlkenbaeva, Dımash Qudaıbergen, Qazaqstannyń eńbek sińirgen qaıratkeri Mádına Sádýaqasova, halyqaralyq konkýrstardyń laýreattary Parvız Nazarov, Temirlan Beısembaı, Nazym Saǵyntaı jáne «Astana Balet» teatry men «Hassak» toby óner kórsetti. Halyq ánderi men kúıleri, Abaıdyń shyǵarmalary oryndaldy. Tájikstannyń óner juldyzdary da ulttyq mádenıetin kórsetip, halyq shyǵarmalaryn naqyshyna keltire shyrqady. Eki eldiń kúıshileri dombyra men dýtarda kúı-tartys jasap, kórermenniń rýhyn bir kóterip tastady.
Merekelik kesh «Astana sazy» qazaq memlekettik folklorlyq ansambliniń súıemeldeýimen ótti. Budan bólek, «Kohı Borbad» foıesinde Qazaqstan Respýblıkasynyń Ulttyq mýzeıiniń qorynan «Qazaq halqynyń qoldanbaly-sándik óneri» atty kórme usynyldy. Kórmeniń negizin XVIII-XX ǵasyrlardaǵy qoldanbaly ónerdiń biregeı zattary quraıdy. Onda kıiz buıymdar, zergerlik buıymdar men atábzelderi, mýzykalyq aspaptar qoıylǵan.
Arǵy-bergi tarıhymen tamyrlasatyn kórshiles elderdiń mádenı-rýhanı jaqyndyǵy árqashan jańǵyra beretini anyq. Qos eldiń irgesin, ádebıeti men mádenıetin, tili men dilin, ulttyq ónerin jalǵar myǵym rýhanı baılanystar aldaǵy ýaqytta da jandana bermek.
