Sena jaǵalaýynda óner kórsetetin otandastarymyzdyń arasyndaǵy eń ataqtysy – Zúlfııa Gabıdýllına. Bıyl kúzde 59 jasqa tolǵaly otyrǵan ol 2016 jyly Rıo-de-Janeıroda bolǵan Paralımpıadada erkin tásil boıynsha 100 metrge júzip, aldyna jan salmaı, altynnan alqa taqty. Bul – talaı jylǵy tarıhy bar atalǵan jarysta Qazaqstan quramasynyń qorjynyna túsken alǵashqy bas júlde. Sondaı-aq Gabıdýllına 50 metrge erkin júzýdi tórtinshi jáne shalqalaı júzýde altynshy oryndarǵa taban tiredi.
Zúlfııa Rahatqyzynyń odan da basqa tolyp jatqan ataqtary bar. Jerlesimiz birneshe ret Germanııanyń ashyq birinshiliginde top jaryp, álemdik rekordty jańartty. 2014 jyly Inchhondaǵy Paraazııa oıyndarynda teńdessiz dep tanylsa, 2015 jyly Glazgodaǵy álem chempıonatynda qos qolaǵa qol jetkizdi. 2017 jyly Meksıkada Sattar Beısembaevtyń shákirti álem chempıony atanyp, Halyqaralyq Paralımpıada komıtetiniń «Dúnıejúzilik jeńister serııasy» atalymy boıynsha arnaıy syılyǵyna ıe boldy.
Atbasarlyq Davıd Degtıarev 2021 jyly Tokıodaǵy oıyndarda top jardy. Paýerlıftıngten 54 kg salmaq dárejesinde synǵa túsken ol qarsylas shaq keltirmedi. Chempıonnyń kórsetkishi – 174 kg. 29 jastaǵy sportshynyń da eki dúrkin álem chempıony, Parazııada jeńimpazy degen ataqtary bar. Sondaı-aq keıingi eki Paralımpıadada jeńis tuǵyryna kóterilgen Raýshan Qoıshybaeva men Nurdáýlet Jumaǵalı da Parıjge attanyp barady. Olardyń maqsaty – altyn alyp, Qazaq eliniń ánuranyn shyrqatý. Rıo-de-Janeıroda paýerlıfıngtiń qas sheberi Raýshan kúmispen kúptelse, júzýshi Nurdáýlet qola medaldy moınynda jarqyratty.
Múmkindigi shekteýli jandar arasyndaǵy eń mańyzdy jarysta joǵaryda esimi atalǵan tórt sańlaqtan bólek, Álı Maqulbekov (para ústel tennısi), Jańyl Baltabaeva men Bıbarys Spataı (parakanoe), Sevda Álıeva men Erkin Ǵabbasov (para nysana kózdeý), Sııazbek Dálıev pen Muratbekov (para júzý), Dastan Muqashbekov, Jolaman Elaman, Gúlbaqyt Qaıyrjanova, Saltanat Ábilqasymqyzy (para jeńil atletıka), Nyshan О́mirálı, Nurlan Dombaev, Kámılıa Dosmalova, Mılana Krasavseva (para taekvondo), Rahmetjan Hamaev, Tursynaı Qabyl, Stanıslav Shákıev (para paýerlıftıng), Berik Izmaǵanbetov, Perdebaı Namuratov, Nurtaý Muqanbetqalıev, Janǵalı Súıeýov, Baýyrjan Sartaev, Qýanysh Tájikov, Erlan Bıtemirov, Erik Qasqabaev, Shyńǵys Medeýov, Erbolat Altaev, Aqylbek Shıkibaev, Erasyl Ábdibek (voleıboldy otyryp oınaý), Baýyrjan Arystanbekov, Aqmaral Naýatbek, Zarına Raıfova, Ǵalymjan Smaǵululy, Erlan О́tepov, Daıana Fedosova, Erǵalı Shámeı, Jurqamyrza Shúkirbekov, Aıala Mereke jáne Álfııa Tlekkabyl (paradzıýdo) syndy sportshylar sheberlik baıqasady.
