Kedergi jasaıtyn emes, qoldaý kórsetetin kez

Elimizde ishki týrızm salasy­nyń áli de jolǵa qoıylmaı kele jatqany az aıtylyp júrgen joq. Sonyń áseri me eken, kim bilsin, ınfraqurylymdyq jobalar qolǵa alyna bastaǵany kóńil qýantady. Alaıda, jańa bastamalarǵa ekologııany alǵa tartyp, qarsylyq kórsetetinder de joq emes. Ásirese, ol «Kók-Jaılaý» kýrortyn salýǵa qatys­ty máselede anyq kórindi. Qaıbir kúni «Kók-Jaılaý» kýrortyna qatysty ótken  jı­na­lysqa 200-ge tarta adam qatyssa, sonyń birazy óz­deriniń kelispeıtindikterin bil­dir­gen. Árıne, basty sebep eko­logııalyq máselelerge kelip tireledi. Eli­mizde birden-bir arzan elektr qýatyn alýǵa bolatyn atom elektr stansasyn salýǵa qatysty máse­leni talqylaǵanda da osyndaı qarsylyqtar oryn alǵan bolatyn. Munda da másele ekologııaǵa aparyp tirel­gen-tin. Munyń barlyǵy el halqynyń ıgiligi úshin jasalyp jatqandyǵyn eskersek, máseleni tek ekologııamen ǵana baılanystyryp qoıýymyz orynsyz, árıne. Máselen, Ońtústik Koreıa taraby memleket qarjysyna taý shańǵysy bazasyn salyp, artynan ony jekege berýge bolatynyn málimdegen-tin. Munyń el halqy úshin de paıdaly jaǵy kóp ekenine kúmán joq. Sol sııaqty elimizde demalys oryndaryn kóptep salyp, olardy basqarýdy jekege ótkizip jatsaq, nur ústine nur emes pe?! Olaı bolsa, nege biz kýrort salamyz degenderdiń aldyn kes-kesteýimiz kerek?.. Sol «Kók-Jaılaý» kýrortyna eni 7 metr, al uzyndyǵy 6023 metrdi quraıtyn jol salynaryn eskersek, bul demalýshylar úshin óte yńǵaıly bolatyny anyq edi ǵoı. Joldarynyń sapasy jóninen Qazaqstan álemde 117-orynda ekenin eskersek, árıne, bizge zaman talabyna jaýap beretindeı joldar aýadaı qajet. Byltyr taratylǵan málimetterge qaraǵanda, týrızm salasynda jyl saıyn Qazaqstannan ózge elderdiń ekonomıkasyna 400 mıllıon dollar ketip jatyr. Al jalpy týrızm úlesi álemdik IJО́-niń 9,4 paıyzyn qurasa, 2012 jyly osy saladan túsken paıda 1,075 mıllıard dollarǵa jetipti. О́kinishtisi sol, elimizde týrızmniń ishki jalpy ónimdegi úlesi 0,3 paıyz ǵana bolsa, memleket qoldaýymen ony 2020 jyly IJО́-niń 3 paıyzyna jetkizý kózdelip otyr. Negizinen, Qazaqstan úshin týrıster TMD elderinen, Qytaıdan, Taıaý Shyǵys pen Úndistannan keledi degen úmit basym. Sondaı-aq, Qazaqstan óz tarapynan ınvestısııa salǵan elder azamattaryna vızalyq jáne mıgrasııalyq rejimdi jeńildetýge kúsh salǵany jón-aq. Sarapshylar EKSPO-2017 kórmesine 2 mıllıonǵa tarta adamnyń keletinin aıtsa, sonyń 300 myńyn sheteldikter quraıdy degen boljam jasap otyr. Qoryta aıtqanda, elimiz úshin ishki týrızmdi damytý mańyzdy mindetterdiń birine aınalýy tıis. Azamattarymyzdyń salamatty ómir saltyn ustanýda týrızmniń atqarar mindeti orasan ekenin eskersek, onda qoldan kedergi jasaýdy toqtatatyn kez jetkeni anyq. Asqar TURAPBAIULY, «Egemen Qazaqstan».