Ár ulttyń damýynda bolashaq urpaqtyń taǵdyry sheshiletin mańyzdy kezeńder bolady. Solardyń biri – AES salý máselesi, bul sheshim bizdiń tehnologııalyq jáne óndiristik damýymyzǵa qaraı qadam basýymyzdy ne bolmasa tek shıkizat óndirý men eksportqa táýeldi ekonomıka retinde qalýymyzdy aıqyndaıdy.
Meniń jáne meniń áriptesterimniń qaýymdastyqtaǵy mindeti – balalarymyzǵa, nemerelerimizge jáne shóberelerimizge gúldengen jáne damyǵan eldi qaldyrý úshin bar kúsh-jigerimizdi jumsaý.
Jaratqan ıemiz Qazaqstanǵa ýrannyń erekshe qorlaryn násip etti jáne osy baılyqty durys ıgerip, óz isine adal menedjmenttiń arqasynda elimizdi álem boıynsha eń iri óndirýshige aınaldyrdy. Endi jetekshi memleketter óz damýy men jetistikteri úshin Qazaqstandyq tabys tarıhyna súıenip otyr. Bizge de endi beıbit atomnyń ıgiligin paıdalanyp, ultymyzdyń damýyna jol ashatyn ýaqyt keldi.
Bizdiń jerimiz ben halqymyz ıadrolyq qarýdyń zardaptarynan ótken aýyr synaqtardy bastan keshirdi. Bul qaıǵyly oqıǵa tek tarıhymyzǵa jara salyp qana qoımaı, Qazaqstanǵa beıbit atom máselelerimen aınalysýǵa erekshe moraldyq quqyq beredi dep esepteımin. Qazaqstan halqynyń atom energııasyn beıbit maqsatta paıdalanýdy qoldaýy tek kommersııalyq turǵydan ǵana emes, bul bizdiń ultymyzdyń kemeldengeniniń belgisi, jasóspirimdik maksımalızmnen ótip, bolashaqqa salqynqandylyqpen qarap, eń jaqsy perspektıvalardy tańdap alýymyzdyń aıǵaǵy.
Bul – Qazaqstan álemdik deńgeıde jetekshi oryn alatyn salalardyń biri jáne halyqaralyq arenada óz ustanymyn sátti qorǵaı alatyn sala.
Bul – Qazaqstandyqtardyń myńdaǵan adamǵa tabysty mansap jolyn ashatyn salalardyń biri. Bul – meniń ózimdi tapqan salam, jáne meniń otandastarym da ózderi men balalary úshin ál-aýqat quryp, Otanymyzdyń gúldenýine berik negiz qalaıdy dep senemin.
Bul – álemniń eń damyǵan elderiniń ekonomıkalyq ósýin eshbir daý-damaısyz, táýlik boıy jáne aýa raıyna qaramastan qoldaıtyn sala. Men bizdiń respýblıka da osy elderdiń qataryna qosylý múmkindigine ıe bolǵanyn qalaımyn jáne atom ónerkásibi bizge bul múmkindikti beretinine senimdimin.
О́z tarapymnan, Qazaqstannyń atom ónerkásibin damytý qaýymdastyǵynyń tóraǵasy retinde, osy jobadan elimizdiń turǵyndary men bıznesi úshin eń joǵary paıda alýyna bar kúsh-jigerimizdi salatynymyzdy jaýapkershilikpen málimdeımin.
Aldııar TOQTAROV,
Atom ónerkásibin damytý qaýymdastyǵynyń Tóraǵasy
