Jahandyq ekologııalyq tıimdilik ındeksiniń bıylǵy deregine sáıkes elimiz 180 memlekettiń ishinde 93-orynǵa jaıǵasypty. Bul Qazaqstannyń áýe sapasy men sý resýrstary salasynda ekologııalyq kórsetkishterdi jaqsartý úshin áli de jumys isteý qajet ekenin dáleldeıdi. Sondyqtan jıynda Mádenıet jáne aqparat mınıstrligi Jastar jáne otbasy isteri komıtetiniń tóraǵasy Qaırat Qambarov memlekettik saıasat deńgeıinde ekologııalyq bastamalardy qoldaý mańyzdy ekenin atap ótti.
«Qazaqstanda jastardyń kóbi ekologııalyq máselelerge qyzyǵýshylyq tanytyp, tabıǵatty qorǵaýǵa baǵyttalǵan aksııalarǵa qatysyp, ekologııalyq jaǵdaıdy jaqsartýǵa arnalǵan ınnovasııalyq jobalar men ıdeıalardy ázirlep jatqanyn kórip júrmiz. Bul – óte qýantarlyq jaǵdaı. Alaıda munymen toqtap qalmaý kerek. Biz bul qyzyǵýshylyq pen qulshynystyń memlekettik deńgeıde qoldaý taýyp, damýyna barlyq jaǵdaı jasaýymyz kerek», deıdi Q.Qambarov.
Mádenıet jáne aqparat mınıstrligi Azamattyq bastamalardy qoldaý ortalyǵy men Qazaqstannyń ekologııalyq qory birlese uıymdastyrǵan basqosýǵa azamattyq qoǵam ókilderi, ekomádenıet pen otbasylyq qatynas salasyndaǵy sarapshylar qatysty. Olar óskeleń urpaq arasynda ekomádenıetti qalyptastyratyn mańyzdy tetikterdi jan-jaqty talqylady. Astana halyqaralyq ýnıversıteti jaratylystaný ǵylymdary Joǵary mektebiniń dekany, tehnıka ǵylymdarynyń kandıdaty Aınur Seıtqan otbasyndaǵy ekologııalyq qundylyqtardy qalyptastyrýda ıek artatyn zertteýlerdiń az ekenin aıtty.
«Jalpy, elimizde ekologııalyq problematıka óte qatty ózektilikke ıe emes buqaralyq sanatqa jatady. El halqynyń problemalyq reıtıngine úńiletin bolsaq, tizimde birinshi orynda turmystyq ál-aýqaty, keıin densaýlyq, bilim degen sekildi kete beredi. Baıqaǵanymyz, jurtshylyq ekologııalyq máselelermen betpe-bet kelgende ǵana belsendilik tanytyp, sana oıanyp, seń qozǵalady. Bul rette buqaralyq aqparat quraldarynyń mańyzy zor. Oǵan qosa sıfrlyq tehnologııalar tárbıe quralyna aınalyp, otbasynda ekologııalyq qundylyq máselesi tasada qalyp jatyr. Burynǵy keńes odaǵyna múshe bolǵan elderdiń zertteýlerine qarasaq, kóbine tabıǵatqa degen súıispenshilikti qalyptastyrý, qorǵaý negizindegi motıvter keńirek qamtylǵan. Ekologııalyq qundylyqtardy otbasynda júzege asyrý boıynsha zertteýler, taldaýlar óte az», deıdi zertteýshi.
Al «Jas ulan» biryńǵaı balalar men jasóspirimder uıymy» respýblıkalyq qoǵamdyq birlestiginiń tóraǵasy Dınara Sádýaqasova bul máselede sarapshylardyń da, ata-analar men jastardyń da ustanymy mańyzdy ekenin atap ótti.
«Ekologııalyq mádenıetti, qundylyqtardy, balalar men jasóspirimder arasynda qalyptastyrý asa mańyzdy. Bul rette tek mektep ne ata-ananyń ǵana kúshi jetpeıdi. Sondyqtan arnaıy keshendi sharalar qajet. «Jastar» ǵylymı-zertteý ortalyǵynyń áleýmettanýlyq zertteýine zer salsaq, respondentterdiń 31,1%-y klımattyń ózgerip, aýa raıy túrlenip, ystyq bola túskenin jetkizdi. Bul rette 24,4%-y jańartylatyn energııa kózderi júıesin keńeıtý kerek dep sanaıdy», deıdi D.Sádýaqasova.
Budan bólek, kezdesýde balalar men jastar arasynda ekologııalyq bilim men mádenıetti arttyrýǵa baǵyttalǵan naqty bastamalar usynylyp, sarapshylar oı-pikir almasty. Ásirese ekologııalyq máseleler týraly habardar etetin bilim kýrstary men naýqandar, otbasynda ekologııalyq tárbıe berýge baǵyttalǵan jobalardy qoldaý máselesi talqylandy.
Dóńgelek ústel qorytyndysynda qatysýshylar ekologııalyq tárbıeni kúsheıtýge jáne jas urpaqtyń turaqty damýyna qolaıly jaǵdaı jasaýǵa baǵyttalǵan birqatar usynys ázirledi. Bastysy, ekologııalyq mádenıet jalpyulttyq ıdeologııaǵa aınalýy qajet ekenin aıtty.
