Qoıylymnyń oqıǵa jelisi mynadaı. Jer-jerden kelgen aqsúıekter Fransııanyń jańa korolin ulyqtaý saltanaty bolatyn Reıms qalasyna barý úshin áýeli «Altyn lalagúl» qonaqúıine ornalasady. Olardyń árqaısysy ózine ǵana tán qyzyqty bolmysymen erekshelenedi. Sol sebepti qonaqúıdiń ishinde kúlkili jaǵdaılarǵa tap bolady. Dramalyq shıelenis Reımske eshqandaı kólik aparmaıtynyn túsingen sátten bastalady. Sonda saıahatshylar patshany qonaqúıde, ıaǵnı óz ishinde ulyqtaı berýdi jón sanaıdy. Aralarynda Italııa, Fransııa, Germanııa, Reseı, Polsha, Ispanııa jáne Anglııadan kelgen qonaqtar bolǵannan keıin, árqaısysy óz memleketiniń gımnin shyrqap, Fransııa aǵzamy H Karlǵa kúlli Eýropanyń atynan quttyqtaýlaryn jetkizedi.
Osyndaı shytyrman qoıylymda otandasymyz Álıhan Zeınolla Melıbeı hanymǵa ǵashyq ári óte qyzǵanshaq orys generaly Graf Lıbenskovtiń rólin somdap shyqty. Atalǵan róldi qalaı ıelengeni týraly ánshi bylaı dep oı tarqatady:
«2022 jyly men Qyrǵyzstan astanasyna aıtýly konsertke shaqyrylǵan edim. Ol jerde orkestrdiń súıemeldeýimen Dj. Rossınıdiń «Sevıl shashtarazy» operasynan kavatınany, J.Bızeniń «Injý izdeýshiler» operasynan áıgili romans oryndadym. Sóıtip, meniń oryndaýymdy Dj.Rossını festıvaliniń dırektory Ernesto Palasıo myrza tyńdap, ózimniń agentim V.Fedelı myrza arqyly Pezaro qalasyndaǵy (Italııa) Dj.Rossını akademııasyna shaqyrtý aldym. Akademııadaǵy oqý baǵdarlamasyna sheberlik saǵattarynyń toptamasy kiredi, olardyń bireýin men álemge áıgili tenor Hýan Dıego Florespen birge jasadym. Sondaı-aq Dj.Rossınıdiń «Reımske saıahat» kólemdi ıtalııalyq operasyndaǵy debıýtim jáne Italııadaǵy taǵy birneshe mańyzdy konsert osy oqý barysyndaǵy jetistigim bolmaq», deıdi ol.
Aıta ketý kerek, akademııadaǵy oqý barysynda álemniń túrli elinen barǵan tórt tenordyń arasynda E.Palasıo Álıhan Zeınollany birinshi quramda Graf Lıbenskovtiń partııasynda debıýt oryndaýǵa tańdap alǵan. Akademııada bilim alýmen qatar, qazaqstandyq tenor Gradara, Fermınıano, Ýrbıno, Pezaro qalalarynda konserttik baǵdarlamalarmen óner kórsetken.
«Reımske saıahat» operasynyń mýzykalyq jáne sahnalyq daıyndyqtary kún saıyn Rossını teatrynda, Eksperımenttik teatrda jáne Skavolını Aýdıtorıýmynda ıtalıan tilinde dırıjer Davıde Levımen jáne halyqaralyq deńgeıdegi pıanıst-koýchtermen birge ótti. Tamyz aıynyń sońynda spektakldiń premerasy óte joǵary deńgeıde qoıyldy», dep pikir qosty tenor Á.Zeınolla.
Eske sala keteıik, akademııada taǵylymdamadan ótý kezinde Álıhan Rýmynııaǵa «Sevıl shashtarazy» operasynyń qoıylymynda Graf Almavıvanyń partııasyn oryndaýǵa shaqyrylǵan edi. Budan bólek, ol Býdapeshtte «Stabat Mater» úlken messasynda óner kórsetken. Sondyqtan onyń bul óner kórsetýi eýropalyq úshinshi debıýti boldy.
