Bir kúnniń ishinde Jangeldın aýdanynda – 19, Amangeldi aýdanynda 18 otbasy qabyrǵasy qyzyl kirpishten kóterilip, tóbesi zamanaýı jasyl shatyrmen jabylǵan jańa úıge qonystandy. Qaz-qatar tizilip, aýyldyń ajaryn asha túsken jańa úılerdiń aýlasy keń, kóshesi asfalttalǵan.
Aýyl turǵyndaryna jańa baspananyń kiltin oblys ákiminiń orynbasary Rınat Muhametqalı men «Qazaqstan halqyna» QQ ókili Shyńǵys Sharapıev tabys etti. Oblys ákimdigi men atalǵan qor arnaıy memorandým aıasynda Amangeldi, Jangeldın jáne Qostanaı aýdandarynda tasqyn sýdan zardap shekkenderge arnalǵan 89 jeke turǵyn úı qurylysyn qarjylandyrǵany týraly buǵan deıin de jazǵanbyz.
Kóktemgi kúıiktiń kermek tamshysy telegeı teńiz bolyp kelgen sýǵa tamsa, kúzdegi qýanyshtyń kóz jasy eńsesi bıik keń úıdiń tabaldyryǵyna tamdy. Jańa baspanaǵa kirgen turǵyndardyń qýanyshynda shek joq. Kúzdiń qara sýyǵyna uryndyrmaı kelistirip úı salyp bergen memleketke, ıgi iske bel sheshe kirisip, ala jazdaı aptap ystyqtyń astynda júrgen qurylysshylarǵa alǵys jaýdyryp jatyr.
«Qurylys aıaqtalǵansha sýyq túsip kete me dep qoryqqanym ras. Tipti úı bıyl salynyp bitedi degenge óz basym bertinge deıin senbeı júrdim. О́ıtkeni mundaǵy jumystyń kóptigi sonsha, bıyl bitpeıtindeı bolyp kórindi. Taqyr jerge bir aýyl salyp shyǵý – ońaı sharýa emes. Tasqynnan qıraǵan eski saman úıdiń ornyna bizge jańa, jyly, jaryq, záýlim baspana berildi. Bárimiz rızamyz. Memleket basshysy Qasym-Jomart Toqaevqa, oblys, aýdanymyzdyń basshylyǵyna úlken alǵysymdy bildirgim keledi. Osy úılerdi salyp shyqqan merdiger kompanııa basshylary men qurylysshylar esh jamandyq kórmesin. Endi tiri adam tirshilik etedi, búgin ómirimizdiń jańa bir jarqyn kezeńi bastalǵan kún dep bilemin», deıdi Amangeldi aýylynyń turǵyny Jánibek Kárimjanov.
Amangeldi aýdanyndaǵy Amantoǵaı, Baıǵabyl, Aǵashtykól aýyldarynyń turǵyndary da baspana qýanyshyn atap ótti. Bul eldi mekenderde sý tasqynynan zardap shekken 5 otbasy jańa úıine qonystandy. Al Jangeldın aýdanyna qarasty Kólqamys aýylynda baspana qýanyshyna kenelgen 19 otbasy jańa qonysyna kirdi.
«Týǵan aýylymyzda jańa, jaıly baspanaǵa kirip jatyrmyz. Kóktemde bastan keshirgen qıyndyq kórgen tústeı óte shyqty. Armanymyz oryndaldy, qýanyshymyz sheksiz. Sý tasqyny eski úıimizdi túbimen shaıyp ketip, qalpyna keltirýge jaramsyz bolyp qalǵan. Basymyzǵa túsken aýyrtpalyqty óz moınyna alǵan memleketimizge, qıyn-qystaý kezeńde dalaǵa qaldyrmaı, boıymyzǵa kúsh-qýat berip, qamqorlyq tanytqan barsha qazaq eline rızashylyǵymdy bildiremin», deıdi Kólqamys aýylynyń turǵyny Alpys Álimbaev.
Saltanatty rásim barysynda shalǵaı shette jatqan eldi mekenderdiń oblys ortalyǵynan qashyqtyǵyna qaramastan, qurylys jumystarynyń qysqa merzim ishinde aıaqtalǵany aıtyldy. Máselen, Amangeldi aýyly Qostanaı qalasynan 420 km, al Jangeldın aýdanynyń Kólqamys aýyly oblys ortalyǵynan 640 shaqyrym shalǵaı jatyr. Joldyń qashyqtyǵy qurylys materıaldary men qajetti tehnıkany jetkizýde úlken qıyndyq týǵyzǵany ras. Alaıda soǵan qaramastan Torǵaıdaǵy turǵyn úı qurylysy merziminen buryn aıaqtalyp, baspanasyz qalǵan jurt kúzdiń salqynyna urynbaı, jyly úıine qonystanyp úlgerdi.
«Qostanaı oblysynda sý tasqyny kezinde barlyǵy 1 283 úı zardap shekti. Olardyń úshten biri qalpyna keltirýge jaramsyz dep tanyldy. Búginge deıin 315 páter satyp alyndy. Bul satyp alynýǵa tıis turǵyn úılerdiń 100 paıyzyn quraıdy. Sonymen qatar sý tasqynynan zardap shekkenderge arnalǵan 153 úıdiń qurylysy tolyǵymen aıaqtaldy», deıdi oblys ákiminiń orynbasary Rınat Muhametqalı.
Arqalyq qalasynda 50 páterli bes qabatty turǵyn úıdiń qurylysy da merziminen buryn aıaqtalǵanyn aıta ketken jón. Atalǵan kópqabatty turǵyn úıdiń janǵa jaılylyǵy sonsha, adam turmysyna qajettiń bári qarastyrylǵan. Elordamyzdaǵy sapaly úılerden bir mysqal da kem emes. Arqalyqtaǵy «aqyldy» úıdiń syrtqy esikterine ishtegi páterlermen beınebaılanysqa shyǵýǵa múmkindik beretin qurylǵylar ornatylǵan. Taıaýda bul úıde de qonystoı atalyp ótpek. Merdiger qurylys kompanııasy óz qarajaty esebinen turǵyndarǵa asúı jıhazdaryn syılaımyz dep otyr.
Tabıǵı apattan kelgen orasan shyǵynnyń ornyn toltyryp, qıraǵan, búlingen dúnıeni qalpyna keltirý, jaı-kúısiz qalǵandardy qańǵytpaı ýaqytsha baspanamen qamtamasyz etip, olarǵa qysqa ýaqyt ishinde jańa úı salyp berý tárizdi áleýmettik salmaǵy mol jaýapty ári saýapty aýqymdy sharýany el bolyp birigip, abyroımen atqaryp shyǵýda «Qazaqstan halqyna» qorynyń orny erek ekenin de atap ótpeske bolmaıdy. Qostanaı oblysynyń ákimdigi men atalǵan qor arasyndaǵy memorandým aıasynda óńirde zardap shekkenderge arnalǵan 89 jeke turǵyn úıdiń qurylysy qarjylandyryldy.
«Qordyń, qurylysshylardyń, ákimdiktiń jáne jergilikti atqarýshy organdardyń birlesken jumysynyń nátıjesinde turǵyzylǵan mynadaı keregesi myqty, eńsesi bıik úılerge qarap, ózderińizben birge qýanyp jatyrmyz. Bul jańa úıler turǵyndardy qýantyp qana qoımaı, shalǵaı aýyldardyń shyraıyn kirgizip, ajaryn asha túskendeı», deıdi «Qazaqstan halqyna» QQ ókili Shyńǵys Sharapıev.
Qostanaı oblysy
