Osyǵan baılanysty óńirdegi oqý oryndarynyń jaǵdaıyn saralap kórdik. Syr biliminiń qara shańyraǵy sanalatyn Qorqyt Ata atyndaǵy Qyzylorda ýnıversıtetinde bul másele tolyq sheshimin tapqan. Osy kúni ýnıversıtet balansynda 780 orynǵa arnalǵan 4 stýdenttik jataqhana bar. Sonymen qatar áriptestik kelisimshart negizinde «Qarjy ortalyǵy» AQ qarjylandyrylatyn «О́rkenıet», «DıLMASh», «Inkar 7» JShS jataqhanalarynan 680 oryn paıdalanýǵa beriledi.
«Osylaısha, qazir oqý orny jataqhanadan stýdentterge 1 460 oryn usynyp otyr. Búginge deıin 1027 stýdent jataqhanaǵa joldama aldy. Sonymen qatar 25 qandas ýnıversıtettiń bilim grantymen, shet memleketten kelgen taǵy da 15 jas arnaıy daıarlyq kýrsynda bilim alady. Bulardyń bári jataqhanamen tolyq qamtylady», deıdi ýnıversıtettegi baspasóz qyzmetiniń mamandary.
Stýdentterdi jaıly jataqhanamen qamtyp otyrǵan oqý ornynyń biri – «Bolashaq» ýnıversıteti. Ýnıversıtet Abaı kóshesiniń boıyndaǵy burynǵy ǵımarat irgesinen záýlim jataqhana salyp, bilim alýshylarǵa barynsha jaǵdaı jasaǵan edi. Qalanyń sol jaǵalaýynan boı kótergen qazirgi kampýs quramynda da 2 birdeı jataqhana tur. Biri – 111, ekinshisi – 92 oryndyq 5 qabatty qos ǵımarat, ishinde oqý zaly, demalys bólmesi, sporttyq jattyǵý zaly men medpýnkt, stýdentter keńesine arnalǵan bólmeleri bar.
M.Mámetova atyndaǵy Qyzylorda pedagogıkalyq joǵary kolledji de – osy salaǵa talaı myńdaǵan maman daıarlaǵan baıyrǵy oqý ornynyń biri. Kolledj dırektory Jaqsygúl Toǵanovanyń aıtýynsha, oqý ornynda 248 orynǵa arnalǵan jataqhana bar.
Osydan 5 jyl buryn Qyzylorda medısınalyq joǵary kolledji stýdentteri úshin 330 oryndyq jańa jataqhana salynyp, paıdalanýǵa berilgen. Demalys ornymen qatar medısınalyq pýnkt, oqý zaly bar jataqhana tońazytqysh, qysqatolqyndy pesh, kir mashınasy sekildi turmystyq tehnıkalarmen qamtylǵan. Jataqhanada mádenı is-shara júıeli ótip turady. «Orda» joǵary kolledjindegi 100 orynǵa arnalǵan jataqhanada da alys aýdandardan kelgen stýdentterge barlyq jaǵdaı jasalǵan.
Byltyr oblystaǵy bilim júıesin damytýdyń óńirlik jol kartasy qabyldanǵan. Oqý-aǵartý mınıstrligi men jergilikti ákimdik birlesip júzege asyratyn jol kartasynda 8 baǵyt boıynsha 107 is-shara josparlanypty. 2023-2029 jyldar aralyǵyn qamtıtyn qujatqa qol qoıý barysynda oblysta stýdentter úshin 2 jataqhana boı kóteretini de aıtyldy.
Jalpy, bilim salasyndaǵy aýqymdy jobalardy júzege asyrýǵa jekelegen kompanııalar qosqan úles mol. Keıingi 10 jylda munaı kompanııalary óńirdiń áleýmettik-ekonomıkalyq damýyna 16 mlrd 600 mln teńgeden astam qarjy aýdarypty. Búginde «QazGerMunaı» kompanııasy 2 mlrd 350 mln teńgege 350 oryndyq zamanaýı úlgidegi Oqýshylar saraıyn salyp jatyr. «Saýts Oıl» kompanııasynyń demeýshiligimen qalanyń sol jaǵalaýynan mýzykalyq kolledjdiń quny 4 mlrd 800 mln teńge bolatyn 650 oryndyq jańa ǵımarat qurylysy da boı kóterip keledi.
Qyzylorda
