Foto: N.Baıbýllın
Máýlen Áshimbaev bıylǵy Joldaý strategııalyq sıpatqa ıe ekenin jáne el damýynyń negizgi salalaryn qamtıtynyn atap ótti. Sondaı-aq ol Memleket basshysynyń Úkimet, Parlament jáne memlekettik organdarǵa júktegen mindetterin iske asyrý jolynda barlyq memlekettik jáne qoǵamdyq ınstıtýttardyń birlesip jumys isteýi asa mańyzdy ekenine nazar aýdardy.
Bul rette aqsha-nesıe jáne fıskaldyq saıasat arasyndaǵy úılesimsizdikti joıý birinshi kezektegi másele ekenin atap ótken jón. Palata Spıkeriniń aıtýynsha, mundaǵy basty messedj – «kórpege qaraı kósilý».
«Prezıdentimiz Úkimetke bıýdjet qarjysyn tıimdi paıdalaný jáne onyń shyǵys bóligin qatań baqylaýda ustaý jóninde pármendi sharalar qabyldaýdy tapsyrdy. Sondaı-aq Ulttyq qordy tıimdi basqarý jáne bıýdjetaralyq qatynastardy ońtaılandyrý mindeti júkteldi. Bul baǵyt ta jergilikti jerlerde qarajatty tıimsiz paıdalanýdy boldyrmaý úshin jetildirýdi qajet etedi. Osy oraıda salyq saıasaty sapaly ekonomıkalyq ósýdi yntalandyratyn tetik bolýǵa tıis», dedi Máýlen Áshimbaev.
Sonymen qatar Senat Tóraǵasy ınvestısııalyq ahýal men bızneske qajetti jaǵdaıdy jaqsartý ulttyq ekonomıkany jańa deńgeıge kóteretinin aıtty. Osy turǵydan kelgende, otandyq resýrstardy belsendi paıdalaný, iri kásiporyndar men aralas óndirister kooperasııasyn damytý jáne óńirlerdegi ınfraqurylymdy jetildirý erekshe mánge ıe.
«Memleket basshysy oblysaralyq jáne aýdanaralyq joldardy orta deńgeıde jóndeý baǵdarlamasynyń aýqymyn keńeıtip, sonyń aıasynda keminde 10 myń shaqyrym joldy qamtýdy tapsyrdy. Odan bólek, Úkimet jyl sońyna deıin energetıka jáne kommýnaldyq sharýashylyq salasyn jańǵyrtý jónindegi jańa ulttyq jobany qabyldaýǵa tıis. Joldaýdaǵy negizgi erekshelikterdiń biri bıylǵy 6 qazanda atom elektr stansasyn salýǵa qatysty jalpyulttyq referendým ótkizý máselesi ekeni anyq. Bul referendým mańyzdy sheshimderdi azamattardyń qatysýymen qabyldaý arqyly «Halyq únine qulaq asatyn memleket» tujyrymdamasyn iske asyrýdyń jarqyn kórinisi bolary sózsiz», dedi Palata Spıkeri.
Kezdesý barysynda Joldaýda aıtylǵan adamı kapıtaldy damytýǵa qatysty tezısterge de basa mán berildi. Naqty aıtqanda, ult densaýlyǵyn jaqsartý, áleýmettik qoldaý júıesin jańǵyrtý, kadrlyq áleýetti arttyrý jáne basqa da sharalar jóninde sóz boldy. Munyń bári Senat qyzmetiniń de negizgi basymdyqtary ekeni aıtyldy.
Osy oraıda Memleket basshysy anyqtap bergen mindetterdi iske asyrý kezinde keshendi tásildiń mańyzy zor. Máýlen Áshimbaev Parlamenttiń atalǵan maqsattarǵa qol jetkizý kezindegi róline toqtaldy. Sondaı-aq Senattyń táýelsiz sarapshylarmen jáne ǵylymı mekemelermen birlesip júzege asyryp kele jatqan ǵylymı-saraptamalyq áleýetti kúsheıtý tájirıbesine nazar aýdardy. Mundaı qadam tıimdi jáne ózekti zańnamalyq bastamalar ázirleýge jol ashady.
«Senat zań shyǵarý qyzmetiniń sapasyn arttyrý úshin ǵylymı-saraptamalyq qaýymdastyqpen belsendi jumys istep keledi. Biz sarapshylardyń tıimdi jáne ózekti zańnamalyq bastamalar ázirleýge yqpal etetin usynystary men ıdeıalaryn árdaıym eskerýge tyrysamyz. Qazir Parlamenttiń aldynda Memleket basshysy júktegen tapsyrmalardy iske asyrýǵa arnalǵan sapaly zańdar qabyldaý mindeti tur. Bul iste Sarapshylar klýby jáne basqa da alańdar aıasynda sarapshylarmen jumys jandana túsedi. Osy rette búgingi talqylaý da Parlamenttiń zań shyǵarý qyzmetiniń sapasyn arttyrýǵa yqpal etedi dep senemin. Biz zańnamalyq jumysty saraptamalyq turǵydan qamtamasyz etýdi kózdeıtin usynystarǵa qashanda ashyqpyz. Sondyqtan sarapshylardy Senattyń saraptama jáne dıalog alańdarynyń jumysyna belsendi qatysýǵa shaqyramyz», dedi Máýlen Áshimbaev.
Sondaı-aq is-sharada Parlament depýtattary, jetekshi ǵylymı ınstıtýttar men zertteý ortalyqtarynyń basshylary jáne ókilderi sóz sóıledi. Olar Joldaýda aıtylǵan mindetterdi tıimdi iske asyrýǵa qatysty óz usynystaryn aıtyp, pikirlerimen bólisti.
