Foto: aqtobegazeti.kz
Uıǵyr aýdanynda 2024 jyldyń 1 qyrkúıek kúni sibir jarasy aýrýynyń belgileri anyqtaldy degen kúdikpen 2 turǵyn aýrýhanaǵa jatqyzyldy. Eki naýqasqa da sibir jarasy aýrý maldy soıǵan kezde juqqandyǵy anyqtaldy.
Aýdandaǵy epıdemıologııalyq jaǵdaıǵa baılanysty sol kúni jedel shtab qurylyp, naqty sharalar atqarý boıynsha jedel otyrys ótti. Shtab otyrysynyń hattamalyq sheshimine sáıkes eń áýeli aýrý oshaǵy retinde Úlken Aqsý aýyldyq okrýgi belgilenip, okrýg aýmaǵy jáne kórshiles eldi mekenderdegi barlyq úılerdi densaýlyq saqtaý salasynyń qyzmetkerleri men veterınarııa salasynyń mamandary aralap, turǵyndarǵa aldyn alý sharalary men densaýlyqtaryna qandaı da bir shaǵymdar bolsa dárigerdiń kómegine júginý qajettigi eskertilip, túsindirý jumystary júrgizildi. Al veterınar mamandar ár úıdiń qorasyndaǵy maldardy tekserdi. Sonymen qatar qańǵybas ıt, mysyqtardy aýlady.
Alǵashqy anyqtalǵan turǵynnyń úıindegi, ıaǵnı aýrý oshaǵynda soıylǵan sıyrdyń qalǵan qaldyq terileri jáne soıǵan kezde qoldanǵan qural-saımandar (balta, pyshaq, et shapqan aǵash) barlyǵy aýdandyq veterınarlyq stansııasynyń jyljymaly ınsenıratorynda kúıdirý ádisimen joıyldy. Aýrý oshaǵynda sanıtarlyq aǵartý sharasy jasalyp, qazirgi tańda qosymsha qadaǵalaý, baqylaý jumystary kúsheıtildi. Sibir jarasyna qatysty jaǵdaıdy zertteý maqsatynda veterınarlyq qyzmet jáne sanıtarlyq epıdemıologııalyq baqylaý basqarmasy syrtqy qorshaǵan ortadan synamalar, tońazytqyshtaǵy soıyp alǵan maldyń eti men baýyrynan, terisinen synamalar alyp, oblystyq zerthanalarǵa jiberildi. Aýrý oshaǵyna, mal qorasyna, úıdiń aýlasyna tolyq zalalsyzdandyrý jumystary «Dezstroılaıt» preparatynyń 1 paıyzdy eritindisimen júrgizildi.
Bıylǵy jyldyń 2 qyrkúıek kúni aýlalardy aralaý barysynda naýqastarmen baılanysta bolǵan 2 turǵynnan aýrýdyń belgileri anyqtalyp, aýdandyq ortalyq aýrýhananyń juqpaly aýrýlar bólimine oqshaýlandy. Olardan tıisti synamalar alynyp, zerthanaǵa joldandy.
Qaýipti indettiń aldyn alý sharalaryna sáıkes jergilikti atqarýshy organ shtab jumysyn jedel uıymdastyryp, baqylaý, qadaǵalaý jumystaryn kúsheıtti. Aýdan aýmaǵynan syrtqa et jáne maldy tasymaldaý nemese syrttan aýdanǵa tasymaldaý áreketterine aýdandyq polısııa qyzmetkerlerimen shekteý qoıyldy.
Aýdan turǵyndaryna et, sút ónimderin satyp alý barysynda tekserilgen jáne ruqsat qujattary bar arnaıy belgilengen oryndardan alý qajettigi, densaýlyqtaryna shaǵym bolsa dárigerdiń kómegine júginý, mal ustaıtyn turǵyndar malda aýrý belgileri nemese basqa da aýytqýlar paıda bolsa birden veterınar mamandarǵa habar berý qajettigi eskertilgen habarlandyrýlar taratyldy. Sondaı-aq jalǵan aqparattar men alypqashpa pikirlerge qulaq aspaı, resmı BAQ betteri men jergilikti atqarýshy organnyń resmı habarlamalary men áleýmettik jeli paraqshalarynda beriletin resmı aqparattardan málimet alý qajettigi de eskertildi.
Jaǵdaı tolyqtaı aýdandyq ákimdiktiń jáne basqa da quzyrly mekemeler men quqyq qorǵaý organdarynyń baqylaýynda.
«Úlken Aqsý aýyldyq okrýginiń turǵynynan sibir jarasynyń belgileri anyqtalýyna baılanysty Uıǵyr aýdany veterınarııalyq bóliminiń 14 aýyldyq okrýg veterınarııalyq pýnktteriniń 90 veterınar mamany kúsheıtilgen rejımde Úlken Aqsý aýyldyq okrýgindegi 139 jeke aýlalarǵa aqparttyq túsindirý, aýrýǵa kúdikti maldardyń bar-joǵyn anyqtaý jáne sibir jarasyna qarsy egý jumystaryn júrgizip jatyr. Úlken Aqsý aýylynda aýrý juqtyrý yqtımaldyǵy bar degen kúdikpen 47 ıt pen 4 mysyq aýlandy.
Aýrý shyqqan úı oshaǵyna, mal qorasyna, aýlasyna jalpy kólemi 324 sharshy metr aýmaqqa, al Jyryq týma ýchaskesinde 141 bas iri qara malǵa sibir jarasyna qarsy ekpe salynyp, atalǵan ýchaskedegi 1800 sharshy metr qorajaıǵa zalalsyzdandyrý jumystary «Dezstroılaıt» preparatynyń 1 paıyz eritindisimen júrgizildi», – deıdi aýdandyq veterınarııalyq bólimi basshysynyń orynbasary Elnur Dosymbekov.
Aýrýdyń shyqqan oshaǵyn anyqtaý, tabý úshin, Úlken Aqsý aýyldyq okrýgi aýmaǵyndaǵy egistik alqaptan, jaıylymnan jáne al Jyryq týma ýchaskesindegi qorajaı mańynan topyraq, qı synamalary alynyp zertteýge jiberilgen.
Búgingi kúnge aýylsharýashylyq maldary arasynda kúdikti aýrý belgileri tirkelmegen, epızootologııalyq ahýal birqalypty, atalǵan jaǵdaı aýdandyq veterınarııa mamandarynyń qatań baqylaýyna alynǵan.
Uıǵyr aýdanynda sibir jarasyna kúdikti jaǵdaılardyń anyqtalýyna baılanysty, veterınarlyq-sanıtarlyq ýaqytsha shekteý sharalary engizilgenmen, karantın jarııalanbaǵany týraly Almaty oblysynyń ákimdigi habardar etti.
«Infeksııanyń taralýyn boldyrmaý maqsatynda mal men aýylsharýashylyq janýarlardan alynatyn ónimderdi eksporttaýǵa shekteý qoıyldy. Sibir jarasy adamnan adamǵa juuqpaıtyndyqtan, azamattardyń júrip-turýyna eshqandaı shekteýler qoıylǵan joq», delingen.
