Foto: Arman Mýhatov
Stıpendııalardyń úshten ekisinen astamy jaratylystaný-tehnıkalyq pánder boıynsha bólindi. Jeńildikke ıe sanattar boıynsha 22 adam shetelde bilim alady.
Jalpy 20 adam – magıstratýra, 6 adam - doktorantýra baǵdarlamalary boıynsha bilim kókjıegin keńeıtse, 24 otandasymyz álemniń jetekshi joǵary oqý oryndary men óndiristik ortalyqtarynda kásibı taǵylymdamadan ótedi.
Úmitkerler Harvard University, Imperial College London, University of Pennsylvania, University of Melbourne, Columbia University, Johns Hopkins University, University of Bristol sııaqty álem boıynsha aldyńǵy qatarly ýnıversıtetterge tústi. Olar aqparattyq tehnologııalar men júıeler, jasandy ıntellekt jáne kıberqaýipsizdik, kólik tehnologııalar jáne logıstıka, qoǵamdyq densaýlyq saqtaý, neonatologııa jáne hırýrgııa, úlken derekterdi taldaý, qurylys, geologııa jáne taý-ken isi, metallýrgııa, qarjy tehnologııasy, ýrbanıstıka jáne matematıka salasy boıynsha bilim-biligin jetildiredi.
«Halyqaralyq baǵdarlamalar ortalyǵy» AQ Basqarma tóraǵasy Álııa Ospanova ortalyq álemdik standarttarǵa sáıkes keletin mamandardy daıarlaýdyń joǵary sapasyn qamtamasyz etý úshin úmitkerlerdi konkýrstyq irikteýge erekshe nazar aýdaratynyn aıtty.
«Qazaqstan Respýblıkasynyń Prezıdenti Qasym-Jomart Toqaevtyń Joldaýynda ǵylymı taǵylymdamalar boıynsha sapaly irikteýdi qamtamasyz etý qajettigi aıtyldy. Konkýrstyq irikteý prosesi qaıta qaraldy, úmitkerlerge qoıylatyn talaptar kúsheıtildi. Halyqaralyq baǵdarlamalar ortalyǵy ǵalymdardy qoldaýǵa arnalǵan bólek basqarmany qurdy, ol jeńildik sanattary boıynsha álemniń jetekshi ǵylymı ortalyqtarynan baılanys ornatýǵa jáne tegin shaqyrtýlar alýǵa kómektesedi. Bul sharalar ǵylym men zertteýlerdi qoldaý jónindegi strategııalyq joba aıasynda ǵalymdardy qoldaýǵa múmkindik beredi», dedi ol .
Sondaı-aq, 33 otandasymyz álemniń jetekshi ǵylymı-zertteý ortalyqtarynda, atap aıtqanda University of Oxford, King’s College London, University of California, Davis, University of Illinois at Urbana-Champaign, University of Minnesota, Twin Cities, CNRS, University of Sussex, Technische Universitat Dresden syndy jetekshi ýnıversıtetter men uıymdarda ekonomıka úshin asa mańyzdy baǵyttar boıynsha ǵylymı taǵylymdamadan ótýge grant jeńip aldy.
«Bolashaq» stıpendııasy ıegerleriniń tizimin myna jerden kórýge bolady. Al shetelde ǵylymı taǵlymdamadan ótýge múmkindik alǵandardyń aty-jóni munda jarııalanǵan.
