Foto: akorda.kz
Qadirli qaýym!
Qurmetti sportshylar!
Búgin kópten kútken baıraqty báseke – V Dúnıejúzilik kóshpendiler oıyndary bastalady. Barshańyz qazaq jerine qosh keldińizder!
Bul – álemdik aýqymda ótip jatqan aıryqsha mańyzdy is-shara. Qazaqstanǵa kelgen baýyrlas memleketterdiń basshylaryna zor rızashylyǵymdy bildiremin. Mártebeli meımandarǵa jáne sportshylarǵa shynaıy alǵys aıtamyn.
Kóshpendiler órkenıeti – dúnıejúzi tarıhynda óshpes iz qaldyrǵan órkenıet. Uly dala kóshpendileri ejelden baıtaq Eýrazııany meken etken. Olar jahandyq damý úderisine túbegeıli ózgeris ákeldi, sol zamandaǵy ozyq tehnologııanyń ıesi boldy. Kóshpendiler bes myń jyl buryn jylqyny qolǵa úıretti. Dúnıeni dúbirletken salt attylar mádenıetin qalyptastyrdy. Qýatty qarý-jaraq pen ǵajaıyp zergerlik buıymdar jasap shyǵardy. Saq dáýiriniń Altyn adamdary – sonyń aıqyn dáleli.
Qazaq jerinen ál-Farabı, Qoja Ahmet Iаsaýı syndy ǵulamalar shyqqan. Olar ilim-ǵylymnyń damýyna orasan zor úles qosty.
Bizdiń babalarymyz alyp memleketter qurdy, úlken qalalar saldy. Uly dalada Otyrar, Túrkistan, Taraz, Saraıshyq sııaqty sáýletti shaharlar boı kóterdi. Kóshpendi jurt batys pen shyǵysqa kópir bolyp, túrli mádenıettiń jaqyndasýyna áser etti.
Osy jerde ejelgi Ǵun ımperııasy, odan soń Túrik qaǵanaty saltanat qurdy. Olardyń dańqty jolyn Altyn Orda men Qazaq handyǵy jalǵastyrdy.
Kóshpendiler órkenıeti – naǵyz kónekóz órkenıet. Shyn máninde, kóshpendi halyqtar barlyq qurlyqta bar. Olardyń izin Eýropa men Azııadan, Afrıka men Amerıkadan kórýge bolady.
Kóshpendilerdiń mádenıeti, rýhanı qazynasy, qundylyqtary – ortaq. Kóshpendi halyq – eń aldymen, rýhy azat jurt. Kóshpendiler úshin ómir – máńgilik qozǵalys. Olardyń ár qadamy – jańa álemge jasalǵan jasampaz qadam.
Biz – ejelden qonaqjaı halyqpyz. Jańalyqqa – jany qumar, túrli mádenıetke – ashyq jurtpyz. Bizdiń ómir saltymyz tabıǵatpen erekshe úılesim tapqan. Kóshpendiler – týmysynan qaısar halyq. Kóshpendilerdiń uly kóshi eshqashan toqtamaıdy.
Myńdaǵan jylǵa jalǵasqan osy kósh qazir basqasha sıpatqa ıe boldy.
Kóshpendi ómir salty qaıta jańǵyrdy. Jahandaný dáýirinde eshqandaı shekara joq. Bir sózben aıtsaq, qazir zamanaýı kóshpendiler paıda boldy. Biz bilim alý, jumys isteý úshin qonys aýdaramyz, basqa elderge saıahat jasaımyz. Bul dáýirde biz erkindik rýhyn saqtaı bilýimiz kerek. Jańa zamannyń jaqsy qasıetterin boıǵa sińirý qajet. Biz – dańqty kóshpendilerdiń muragerimiz, batyr babalardyń urpaǵymyz. Olar el men jerdi qorǵap, ulan-ǵaıyr dalany bizge amanat etti. Osy qasterli murany kózdiń qarashyǵyndaı saqtap, jas býynǵa tabystaý – bárimizge ortaq paryz.
Kóshpendiler oıyndary – osyndaı ıgi maqsattan týǵan biregeı joba. On jyl buryn osy jarysty alǵash uıymdastyrǵan qyrǵyz baýyrlarǵa alǵys aıtamyn. Bul – ulttyq sport túrlerinen ótetin álemdegi eń iri doda. Ony Kóshpendiler olımpıadasy deýge bolady. Bul oıyndar dala órkenıetin jer jahanǵa pash etedi. Sport – ózara qurmet pen syılastyq sımvoly.
Sporttyń basty mıssııasy – halyqtar dostyǵyn nyǵaıtý. Qazaqstan búkil álemge beıbitshilik pen kelisim mekeni retinde tanymal. Elimizde túrli etnos ókilderi tatý-tátti ómir súrip jatyr. Biz alys-jaqyn sheteldiń bárimen tyǵyz baılanys ornattyq. Basqa memleketter de ózara dostyq qatynasta bolǵanyn qalaımyz. Sondyqtan Kóshpendiler oıyndary yntymaǵymyzdy bekemdeı túspek.
Qurmetti dostar!
«Uly dala dúbiri» – elimiz úshin tarıhı oqıǵa. Saryarqanyń saıyn dalasy 5 kún boıy dúbirge tolady. Kúlli álem jurty naǵyz kóshpendilerdiń bolmysyna kýá bolady. Bul – birlik pen tatýlyqtyń toıy. Dostyǵymyz máńgi bolsyn!
V Dúnıejúzilik kóshpendiler oıyndaryn ashyq dep jarııalaımyn!
