SÝRETTE: mergen Jánibek Qulmyrzaev
Bul saıystar «Pýta», «Qalqan» jáne qazaq tanymyndaǵy «Zhamby» stılderi boıynsha ótip jatyr. Jarystyń alǵashqy kúni mergender «Pýta» stılinen synǵa tústi. Bul túrdiń ereksheligi – «Pýta» atty qumyra pishindes (erler – 70 metr, áıelder – 60 metr) nysanaǵa bir dúrkin kezek-kezek 9 oq jumsaıdy. Oq qumyra músinge daryǵan saıyn bir-bir upaıdan beriledi. Jarys erejesi boıynsha eki sadaqshy qatar synǵa túsip, jeńilgeni jarystan shyǵyp otyrady.
Atalǵan jarys barysynda sońǵy týrda majar sportshysymen mergendik synasqan elimizdiń erler quramasynyń múshesi Jánibek Qulmyrzaev qarsylasyn 13:10 esebimen jeńip, altyn medal ıesi atandy. Marapattaý rásimi kezinde baspasóz ókilderine suhbat bergen Jánibek Ábdiýálıuly: «Ulttyq quramada menen basqa 6 azamat bar. Bulardyń barlyǵy derlik altyn alýǵa laıyqty. Biraq bul mártebe maǵan buıyrǵanyna qýanyshtymyn», dedi.
Osy saıys túri boıynsha óner kórsetken ulttyq qurama múshesi, dástúrli sadaq atýmen aınalysqanyna eki-aq jyl bolǵan qaryndasymyz, Qazaqstan kýbogi jáne el birinshiliginiń jeńimpazy Aıkórkem Batıhan men Qasymhan Qanat qola júldege ıe boldy.
Ulttyq quramanyń bas bapkeri Dıas Ahmetovtiń aıtýyna qaraǵanda, mergender dúbirli dodaǵa jaqsy daıyndyqpen kelipti. Jarysqa daıyndyq barysynda qurama Malaızııa eline baryp oqý-jattyǵý jıynyn ótkizip kelgen. «О́ıtkeni malaı jurtynyń sadaqshylary álemdik deńgeıde bıik mártebege ıe. Olardan kóp nárse úırendik. Sonyń nátıjesi osy», deıdi bas bapker.
