Foto: Aqorda baspasóz qyzmeti
Senim gramotalaryn Ispanııa Koroldiginiń elshisi Lýıs Fransısko Martınes Montes, Estonııa Respýblıkasynyń elshisi Iаap Ora, О́zbekstan Respýblıkasynyń elshisi Bahtııor Ibragımov, Sýdan Respýblıkasynyń elshisi Muhammed ál-Gazalı Sırradj, Rýanda Respýblıkasynyń elshisi Charlz Kaıonga, Domınıkan Respýblıkasynyń elshisi Alehandro Arıas Sarsýela jáne Mavrıkıı Respýblıkasynyń elshisi Hesvar Djanke tapsyrdy.
Memleket basshysy dıplomattar aldynda sóz sóıledi.
«Qazaqstan syrtqy saıasatynda beıbitshilikti jaqtaıdy, BUU Jarǵysynyń qaǵıdattaryn berik ustanady jáne halyqaralyq yntymaqtastyqqa árdaıym ashyq. Biz Birikken Ulttar Uıymynyń jahandyq keńistiktegi ornyn eshqandaı qurylym almastyra almaıtynyna nyq senimdimiz. Bul biregeı uıymdy árqashan qoldaımyz. Osy oraıda sizderdiń elderińizben ekijaqty qarym-qatynasty, sondaı-aq kópjaqty deńgeıdegi baılanystardy damytýǵa nıettimiz. Qazaqstan – qarqyndy damyp kele jatqan memleket. Biz ekonomıkamyzdyń turaqtylyǵyn qamtamasyz etýge umtylyp otyrmyz. Árıne, bul ońaı emes. Onyń tabysty bolýy kóp jaǵdaıda halyqaralyq yqpaldastyqqa, sonyń ishinde sizderdiń elderińizben aradaǵy yntymaqtastyqty damytýǵa baılanysty», dedi Prezıdent.
Qasym-Jomart Toqaev elshilerdi Qazaqstandaǵy dıplomatııalyq mıssııalarynyń resmı bastalýymen quttyqtap, olardyń memleketteriniń basshylaryna izgi tilegi men sálemin joldady.
