Almaty oblystyq energetıka jáne TÚKSh basqarmasynyń ókili Erjan Beıbituly oblys boıynsha 43 qazandyqtyń jóndeý jumystary aıaqtalyp, olardyń qýattylyǵy men tıimdiligi artqanyn alǵa tartty.
Ile aýdanynyń Boraldaı jáne Baıken aýyldaryndaǵy qazandyqtardy jańǵyrtýǵa qosymsha qarjy bólinip, jumystardyń 50 paıyzy aıaqtalǵan. Atalǵan 5 qazandyqtyń jumysy qazan aıynda tolyq aıaqtalady dep josparlanǵan.
«Sonymen qatar turǵyndarǵa qajetti 714 myń tonna kómir jetkizýge kelisimsharttar jasaldy. Qazirgi ýaqytta óńirge 125,1 myń tonna kómir jetkizilip, ortasha baǵasy tonnasyna 18 500-23 000 teńgeni quraıdy. Kómir sapasy men qoljetimdiligin qamtamasyz etý maqsatynda barlyq operator qatań qadaǵalanady», dedi Erjan Beıbituly.
Sondaı-aq óńirde elektrmen jabdyqtaý jelilerin jańartý da belsendi túrde júzege asyrylyp jatyr. 1185 km elektr jelisin jóndeý josparlanyp, onyń ishinde kúrdeli jóndeýdiń 85 paıyzy, aǵymdaǵy jóndeýdiń 75 paıyzy aıaqtalǵan. Bul sharalar jelilerdiń tozýyn 5 paıyzǵa tómendetýge, turǵyndardy turaqty elektr qýatymen qamtamasyz etýge baǵyttalǵan.
Al oblystyq Tótenshe jaǵdaılar departamentiniń memlekettik órt baqylaý basqarmasynyń bas mamany Mıras Nurbaıulynyń sózinshe, órt qaýipsizdigin kúsheıtý maqsatynda áleýmettik osal toptardyń úılerine kómirtegi totyǵyn anyqtaıtyn 787 datchık ornatý jumystary júrgizilip jatyr.
«Bul sharalar turǵyndardyń qaýipsizdigin arttyrýǵa jáne jylytý maýsymynyń kedergisiz ótýine baǵyttalǵan. Datchıkter áleýmettik osal toptardyń úılerine tegin ornatylady. Sonymen qatar turǵyndarǵa órt qaýipsizdigi boıynsha túsindirý jumystary júrgizilip jatyr», deıdi tótenshelik maman.
Aıta ketý kerek, óńirde qazandyqtardyń tıimdiligin arttyrý men turǵyndardyń qaýipsizdigin qamtamasyz etýge baǵyttalǵan bul sharalar qysqy maýsymnyń qıyndyqsyz ári kedergisiz ótýine septigin tıgizbek.
Almaty oblysy
