Sýretterdi túsirgen – Erlan OMAR, «EQ»
2010 jyldan beri turaqty uıymdastyrylyp kele jatqan Dúnıejúzilik kóshpeliler oıyndaryn qabyldaǵan Astana etnosport alamanynyń aıbynyn asyryp, dańqyn eselep, kósheli istiń kóshinen kerýen tartty. 21 sport túrinen 97 medal jıyntyǵy sarapqa salynyp, 89 elden sportshylar qatysty. Bizdiń eldiń sańlaqtary 43 altyn, 34 kúmis, 37 qola medal enshilep, jalpy nátıjede top bastady.
Alty qurlyqqa saýyn aıtylǵan etnosport Olımpıadasyn ótkizýge boı kótergen «Kóshpeliler álemi» etnoaýylynda ótken jabylý saltanatynda Bilál Erdoǵan alǵaýsyz kóńilin aqtardy. Dúnıejúzilik etnosport konfederasııasynyń prezıdenti aýqymdy sharany aýyrsynbaı arqalaı bilgen qazaq eline, Memleket basshysy Qasym-Jomart Toqaevqa zor alǵysyn jetkizdi. «Qadirli qonaqtar, baýyrlas Qazaqstannyń ardaqty azamattary! Barshańyzǵa izgi sálemim men sheksiz qurmetimdi joldaımyn. Maǵjan Jumabaev jyrlaǵan alystaǵy baýyryńyz retinde Túrkııadan barsha halqymyzdyń duǵaı-duǵaı sálemin ákeldim. Bul tamasha jetistik sizderge tıesili, ardaqty qazaq eli. Bar bolyńyzdar, nar bolyńyzdar! V Dúnıejúzilik kóshpeliler oıyndaryn ótkizgen Qazaqstan túrki áleminiń týystas, baýyrlas ekenin, myzǵymas dostyǵy beriktigin dúnıe júzine áıgiledi. Osynaý etnosport dodasynda túrkitildes elderdiń baı murasy dáriptelip, salt-dástúri nasıhattaldy. Kelesi dúnıejúzilik etnosport qabyldaıtyn Qyrǵyzstanǵa sáttilik tileımin», dedi Bilál Erdoǵan.
Týrızm jáne sport mınıstri Erbol Myrzabosynov aptaǵa ulasqan alamannyń aıaqtalǵan sátine jetkenimizdi atap ótti. «Baıraqty báseke ulttyq sportymyzdy ulyqtap, salt-dástúrimizdi dáriptep, mádenı muramyzdy tórtkúl dúnıege áıgilegen biregeı oqıǵa retinde tarıhta qaldy. Memleket basshysy Qasym-Jomart Toqaevtyń tikeleı bastamasymen qazaq topyraǵynda uıymdastyrylǵan Kóshpeliler oıyndary – máni tereń, mazmuny baı biregeı joba. Onyń túrki áleminiń altyn besigi – Qazaq jerinde jalaýyn jelbiretkeni – biz úshin zor mártebe ári shyn maqtanysh.
Bul bizge ulttyq sport túrlerin damytyp, tanytýǵa ǵana emes, sondaı-aq týrıstik áleýetimizdi jarqyrata kórsetýge berilgen tamasha múmkindik boldy. Eń bastysy, Qazaqstan ádettegideı sport arqyly memleketter arasyndaǵy baılanysty bekemdeýde mańyzdy qadam jasady.
О́zderińiz tamashalap, kýá bolǵandaı, Dúnıejúzilik kóshpeliler oıyndaryna 89 memleketten 2500-den astam sportshy qatysty. 21 sport túrinen 97 medal jıyntyǵy sarapqa salyndy. 30-dan asa memlekettiń sportshylary medal ıelendi. Onyń ishinde aıtýly alamandaǵy baǵdarlamanyń negizin quraǵan Kóshpeliler órkenıetiniń ókilderinen bólek, Fransııa, Italııa, Aýstralııa, Majarstan, Polsha, Rýmynııa sekildi memleketter de altyn medal oljalady. Júlde alǵan memleketter qatarynda muhıt asyp kelgen Kanada, Meksıka sportshylary da bar.
Astana tórindegi oıyndardan keıin álemde etnosportqa degen qyzyǵýshylyq odan ári arta túsetinine kámil senemin. Biz sporttan bólek, mádenı jáne ǵylymı baǵdarlamaǵa da erekshe nazar aýdardyq. Mundaı álemdik aýqymdaǵy oqıǵadan ǵylymı iz qalýy qashanda mańyzdy. Aıtýly alamandy oıdaǵydaı ótkizýge atsalysqan barshańyzǵa rızashylyǵymdy bildiremin. Ortaq iske óńirler de úlken úles qosqanyn, Oıyndardyń mazmunyn baıytqanyn bóle-jara atap ótýge tıispiz. Qatysýshylar men qonaqtarǵa tike turyp qyzmet kórsetken eriktilerdiń eńbegi de eren. Kelesi VI Dúnıejúzilik kóshpeliler oıyndaryn baýyrlas memleket – Qyrǵyz Respýblıkasy qabyldaıdy. Qyrǵyz eliniń aldaǵy básekeni joǵary deńgeıde ótkizýine tilektespin. Etnosport dodasynyń bedeli bıikteı bersin!» dedi mınıstr.
Tórtkúl dúnıeniń dıdaryn ózine aýdarǵan Dúnıejúzilik kóshpeliler oıyndarynyń jabylý saltanaty ásem án men tátti kúımen kómkerildi. «Naz» memlekettik bı teatry, «Royal Dance» balet shoýy, Erkeǵalı Rahmadıev atyndaǵy Memlekettik akademııalyq fılarmonııasy, Qyrǵyz Respýblıkasynyń «Qambarqan» folklorly-etnografııalyq ansambli, Qazaqstannyń eńbek sińirgen qaıratkeri Qaraqat Ábildına, Qaırat Baekenov, halyqaralyq konkýrstardyń laýreaty Mádı Syzdyqov jáne «Melomen» toby óner kórsetti.
Qorytyndy sharada Dúnıejúzilik kóshpeliler oıyndarynyń rámizi – torsyq Qyrǵyz Respýblıkasynyń Mádenıet, aqparat, sport jáne jastar saıasaty mınıstri Altynbek Maqsutovqa tabystaldy.
